Türkiyə gələn il Bakıda keçiriləcək Beynəlxalq turizm sərgisində milli stendlə iştirak edəcəkdir
Bakı, 31 avqust (AZƏRTAC). Türkiyə 2012-ci ildə Azərbaycanda
keçiriləcək Beynəlxalq turizm sərgisində milli stendlə iştirak edəcəkdir. Ümumiyyətlə, qardaş ölkə 2012-ci ildə milli və şirkət səviyyəsində 62 ölkədə olacaq 157 turizm sərgisində iştirak edəcəkdir.
AZƏRTAC Türkiyə KİV-lərinə istinadla xəbər verir ki, bu barədə Türkiyənin Mədəniyyət və Turizm Nazirliyinin tanıtma şöbəsinin müdiri Güven Taşbaşı demişdir.
G. Taşbaşı bildirmişdir ki, Türkiyənin Mədəniyyət və Turizm Nazirliyi və turizm şirkətləri hər il bu ölkənin tarixi, turizm məkanlarının tanıdılması məqsədilə dünyanın müxtəlif ölkələrində keçirilən beynəlxalq turizm sərgilərində iştirak edir.
Türkiyə gələn il aprelin 12-dən 14-dək Bakıda keçiriləcək 11-ci Azərbaycan Beynəlxalq turizm və səyahətlər sərgisində (AİTF-2012) tərəfdaş ölkə kimi və milli stendlə iştirak edəcəkdir. Bu sərgidə iştirak etmək istəyən Türkiyənin əsas turizm şirkətləri də artıq hazırlıqlara başlamışlar.
Bölmənin digər xəbərləri
