TÜRKİYƏ İRANDAN GƏTİRİLƏN MALLARIN 60 FAİZİNİN GÖMRÜK RÜSUMUNU AZALTMIŞDIR

03.11.2004 [16:26]
Çap et
A⁺ A^-

AZƏRTAC-ın İRNA agentliyindən aldığı xəbərə görə, İranın Qərbi Azərbaycan vilayətinin ostandarı Cəmşid Ənsari noyabrın 2-də Urmiyada keçirilən mətbuat konfransında bildirmişdir ki, İranın və Türkiyənin birgə sərhədyanı ticarət bazarlarında əmtəə dövriyyəsi 100 milyon dollara çatmışdır.

Ənsari demişdir ki, Türkiyə sərhədyanı ticarət bazarları vasitəsilə idxal edilən İran mallarının 60 faizinin gömrük rüsumunu 40 faiz azaltmışdır. Lakin bu tədbirlər İranın kənd təsərrüfatı məhsullarına aid deyildir.

İran isə idxal olunan Türkiyənin həmin bazarlar vasitəsilə 68 adda mallarının gömrük rüsumunu təxminən 20 faiz azaltmışdır.

Bu tədbirlərin İranla Türkiyə arasında sərhədyanı ticarətin sürətlə inkişaf etməsinə təkan verəcəyi bildirilir.