TÜRKİYƏ TURİZMİN İNKİŞAFINDA AZƏRBAYCANA HƏRTƏRƏFLİ KÖMƏK GÖSTƏRƏCƏKDİR
Türkiyənin Səyahət Agentlikləri Birliyinin və Turizm Nazirliyinin Azərbaycanda səfərdə olan nümayəndə heyətinin üzvləri dekabrın 12-də Şəhidlər xiyabanını ziyarət edərək, Vətənimizin müstəqilliyi və ərazi bütövlüyü uğrunda həlak olmuş oğul və qızlarımızın məzarları üzərinə, habelə şəhid türk əsgərlərinin xatirə abidəsi önünə gül qoymuşlar.
Nümayəndə heyəti həmin gün gənclər, idman və turizm naziri Əbülfəz Qarayevlə görüşmüşlər. Qonaqlar bildirmişlər ki, Türkiyə turizmin inkişafında Azərbaycana hərtərəfli kömək göstərəcəkdir. Türkiyə iş adamları İstanbuldakı turizm kollecində oxuyacaq azərbaycanlı tələbələrin təhsil haqqını ödəmək, bir sıra proqramlar və pilot layihələri, o cümlədən Azərbaycan mehmanxanalarında xidmət səviyyəsinin yüksəldilməsinə yönəldilmiş proqram və layihələri həyata keçirmək niyyətində olduqlarını vurğulamışlar. Onlar Türkiyə Səyahət Agentlikləri Birliyinin Azərbaycanda nümayəndəliyini açmağı da təklif etmişlər.
Əbülfəz Qarayev türkiyəli mütəxəssisləri nazirliyin nəzdində bu yaxınlarda açılmış idman və turizm litseyində “mehmanxana təsərrüfatı” fənnindən dərs deməyə dəvət etmiş, Türkiyə sərmayəçilərini ölkəmizin turizm sahəsinin inkişafı üçün səylərini fəallaşdırmağa çağırmışdır. O, Türkiyənin aparıcı turizm agentliklərinin Azərbaycanda nümayəndəliklərinin açılması ideyasını də dəstəkləmişdir.
Bölmənin digər xəbərləri
