Türkiyəyə müalicə məqsədilə səfər edən turistlərin sayı hər il 150 mini ötür
Bakı, 1 avqust (AZƏRTAC). Müalicə turizmi hazırda dünyada çox əhəmiyyət verilən və böyük investisiyalar qoyulan turizm növlərindən biridir. Turizmin bu növünün yüksək səviyyədə inkişaf etdiyi ölkələrdən biri də Türkiyədir. Hər il 150 min turist bu ölkəyə müalicə məqsədilə səfər edir.
Bu barədə AZƏRTAC-a məlumat verən Türkiyənin Azərbaycandakı səfirliyinin mədəniyyət və tanıtım müşavirliyinin əməkdaşı Nizami Zöhrabi bildirmişdir ki, 2011-ci ildə ölkənin müalicə turizmindən 4 milyard avro gəlir əldə edəcəyi proqnozlaşdırılır. Bu ölkənin müalicə turizmindən qazandığı ən böyük üstünlük isə keyfiyyətli xidmət və aşağı qiymət təklif etməsidir.
Səfirlik əməkdaşı bildirmişdir ki, bu yaxınlarda Türkiyə hökuməti tərəfindən ölkədə müalicə turizminin inkişafı istiqamətində daha bir addım atılmışdır. 2011-ci il iyunun 13-dən etibarən ölkəyə müalicə məqsədilə gələn turistlər Türkiyənin Səhiyyə Nazirliyinin tabeliyində olan xəstəxanalara da müraciət edə biləcəklər.
Hazırda Türkiyədə 650 sağlamlıq mərkəzi, onkologiya, süni mayalanma, ürək-damar xəstəlikləri, orqan nəqli, plastik cərrahiyyə, stomatologiya, göz xəstəlikləri kimi xəstəliklərin müalicəsinə dair ixtisaslaşmış xəstəxanalar fəaliyyət göstərir. Bununla yanaşı, Türkiyədə çoxlu sayda termal sağlamlıq mərkəzləri də vardır. Ölkə ərazisində ümumilikdə 1500-ə yaxın termal və şəfalı su mənbələri mövcuddur.
Qeyd edək ki, 2010-cu ildə dünyada müalicə turizmi sahəsində dövriyyənin həcmi 78,5 milyard dollara çatmışdır. 2012-ci ildə isə bu sahədən əldə edilən gəlirlərin həcminin 100 milyard dollara çatacağı proqnozlaşdırılır.
Bölmənin digər xəbərləri
