“Üç kitabın bir təqdimatı” - unudulmaz qələm sahiblərinə ədəbiyyat abidəsi
Bakı, 13 may, AZƏRTAC
...Bu gün onların heç biri aramızda yoxdur. Oxucular isə onların imzalarını müxtəlif vaxtlarda mətbuat səhifələrində maraqla axtarıb, qələmə aldıqları fərqli janrlı yazıları böyük həvəslə oxuyublar. Bu gün onların xarakteri, peşəkarlıqları və yaradıcılıqları barədə ən xoş xatirələr dolaşır. Ölkənin ən çox oxunan mətbu orqanında çalışan bu qəzet əməkdaşlarının keçdiyi həyat yolu gənc nəsil üçün nümunədir.
AZƏRTAC xəbər verir ki, bu barədə mayın 13-də Azərbaycan Mətbuat Şurası və “Xalq qəzeti” rəhbərliyinin birgə təşkil etdiyi “Üç kitabın bir təqdimatı” adlı görüşdə danışılıb.
Görüşdə Vətən müharibəsi günlərində yazılmış “And və əməl”, bir əsrdən artıqdır mətbu nəşr kimi fəaliyyət göstərən “Xalq qəzeti”nə (“Kommunist”) rəhbərlik etmiş görkəmli qələm sahibləri barədə yazılardan ibarət “Baş redaktorlarımız haqqında yazılanlar” və son 35 ildə həmin qəzetdə çalışmış, bu gün aramızda olmayan müxbir və əməkdaşlar haqqında xatirələri əhatə edən “Unudulmazlar redaksiyası” kitabları təqdim olunub. Hər üç kitabın müəllifi Əməkdar jurnalist İttifaq Mirzəbəylidir.
Kitablarda “Xalq qəzeti”nin redaksiyasında çalışmış və əbədiyyətə qovuşmuş həmkarlar barədə yazılar toplanıb.
Layihənin rəhbəri Əflatun Amaşov çıxışında bildirib: “Dünyasını dəyişmiş həmkar və yol yoldaşlarımızın ehtiramla anılması, onların xatirəsinin müntəzəm yad edilməsi mənəvi borcumuzdur. Bu gün təqdimatı keçirilən kitabları ərsəyə gətirməklə biz onların unudulmaz xatirələrinə bir ədəbiyyat abidəsi ucaltmaq istədik”.
“Xalq qəzeti”nin əməkdaşları – Əməkdar mədəniyyət işçisi Qüdrət Piriyev, Zərifə Bəşirqızı və digərləri çıxışlarında kitabların yaradıcılıq məziyyətləri, müəllifin böyük əməyi və işgüzar keyfiyyətləri haqqında danışıblar. Qeyd edilib ki, “Baş redaktorlarımız haqqında yazılanlar” kitabında müxtəlif dövrlərdə qəzetə rəhbərlik etmiş görkəmli qələm sahibləri – Əli Vəliyev, Cəmil Əlibəyov, Xasay Vəzirov, Ağababa Rzayev, Rəşid Mahmudov, Ramiz Əhmədov və başqaları haqqında oxunaqlı yazılar əksini tapıb.
“Unudulmazlar redaksiyası” kitabında müstəqillik illərində nəşrə rəhbərlik etmiş, jurnalist kadrların yetişməsində mühüm rol oynamış pedaqoq Tofiq Rüstəmov, Əməkdar mədəniyyət işçisi Şakir Yaqubov, “Səhər” qəzetinin baş redaktoru Məzahir Süleymanzadə, yarım əsrdən çox fotomüxbir kimi fəaliyyət göstərmiş Cahangir İbadov və bölgə müxbirləri Əşrəf Hacıyev, Bariz Əsədov, Firudin Rəsulov, Ziyəddin Sultanov, fotomüxbir Rafiq Salmanov və digər publisistlər, əməkdaşlar haqqında dəyərli xatirə yazıları yer alıb.
Qeyd olunub ki, kitabdakı yazılar sadəcə tərcümeyi-hal deyil, müəllifin onların peşəkarlığına, yaradıcılığına və insanlıq keyfiyyətlərinə olan səmimi münasibətinin, həssas yanaşmasının ifadəsidir. Kitabların müəllifi yalnız öz yazıları ilə kifayətlənməyib, həmkarlarının da qələmə aldığı yazılara səxavətlə yer ayırıb.
Tədbirdə iştirak edən mərhum jurnalistlərin ailə üzvləri çıxış edərək “Xalq qəzeti” redaksiyasına və kitabların müəllifinə minnətdarlıqlarını bildiriblər.
Bölmənin digər xəbərləri
