Ukrayna Azərbaycanlı Gənclər Birliyi milli mənəvi dəyərlərimizin təbliğini ən ümdə vəzifəsi hesab edir
Bu fikir UAGB-nin ikinci hesabat-seçki konfransında səslənib.
Konfrans iştirakçıları əvvəlcə ümummilli lider Heydər Əliyevin Kiyevdə ucaldılan abidəsi önünə tər çiçəklər düzərək dahi şəxsiyyətin əziz xatirəsinə dərin hörmət və ehtiramlarını bildiriblər.
Azərbaycanın Ukraynadakı səfirliyinin “Naxçıvan” salonunda davam etdirilən tədbirdə əvvəlcə dövlət himni səsləndirilib.
Hesabat-seçki konfransında çıxış edən səfir Eynulla Mədətli ümummilli lider Heydər Əliyevin dövlət quruculuğu strategiyasında gənclərin inkişafına göstərdiyi xüsusi diqqət və qayğıdan söz açıb. Bu siyasətin Prezident İlham Əliyev tərəfindən böyük uğurla davam etdirildiyini diqqətə çatdıran diplomat dörd il əvvəl fəaliyyətə başlayan Birliyin nəcib amallara xidmət etdiyini, Vətənimiz və dövlətimiz naminə səmərəli tədbirlər həyata keçirdiyini vurğulayıb.
E.Mədətli yüksək fəallığına görə UAGB-nin sədri Anar Tahirova Azərbaycanın Ukraynadakı səfirliyinin diplomunu təqdim edib.
Diasporla İş üzrə Dövlət Komitəsinin məsul əməkdaşı Ruslan Quliyev, Ukraynadakı diasporumuzun nümayəndələri Qüdrət Hacıyev, Akif Gülməmmədov və digərləri UAGB-nin keçirdiyi tədbirlərin əhəmiyyətini yüksək qiymətləndirərək quruma gələcək fəaliyyətində uğurlar arzulayıblar.
Sonra Birliyin sədri Anar Tahirovun UAGB-nin dördillik fəaliyyəti ilə bağlı hesabatı dinlənilərək qənaətbəxş hesab olunub.
A.Tahirov bildirib ki, dörd il əvvəl təsis olunan UAGB-nin sıralarında bu gün yer alan minlərlə azərbaycanlı gənc özlərini ulu öndər Heydər Əliyev ideologiyasının mənəvi daşıyıcıları hesab edirlər. O, Azərbaycan Prezidenti İlham Əliyevin rəhbərliyi ilə Vətənimizin qüdrətli dövlətə çevrilməsindən qürur duyduqlarını söyləyib.
Sonra təşkilati məsələlərə baxılıb. Ukraynanın 20 vilayətindən 80 gəncin qatıldığı konfransda qurumun yeni sədri və idarə heyətinin tərkibi seçilib. Gənclərin yüksək etimadını qazanan İlhamə Allahverdiyeva UAGB-nin yeni sədri seçilib.
Birliyin sədri seçilməsinə görə konfrans iştirakçılarına minnətdarlığını bildirən İlhamə Allahverdiyeva təşkilatın fəaliyyət proqramını açıqlayıb. O, qeyd edib ki, fəaliyyət proqramı ümummilli lider Heydər Əliyev ideologiyasından qaynaqladığı üçün bizi qarşıda böyük nailiyyətlər gözləyir. Çünki bu ideologiyanın kökündə Azərbaycanımıza, Vətənimizə və dövlətimizə yüksək sevgi dayanır.
Tədbirin sonunda UAGB-nin fəxri diplomları təqdim olunub.
Zeynal Ağazadə
AZƏRTACın-ın xüsusi müxbiri,
Kiyev
Bölmənin digər xəbərləri
