Ukrayna dilində çapdan çıxmış “Poliqrafçının ölümü” kitabının Kiyevdə təqdimatı olmuşdur
Kiyev, 29 aprel (AZƏRTAC). Aprelin 29-da Azərbaycanın və Ukraynanın dövlət bayraqları ilə bəzədilmiş Ukrayna Milli Yazıçılar İttifaqında (UMYİ) Elmira Axundova və İsa Nəcəfovun Ukrayna dilində çapdan çıxmış “Poliqrafçının ölümü” kitabının təqdimatı olmuşdur.
Tədbir ulu öndər Heydər Əliyevin 90 illik yubileyi çərçivəsində “Azərbaycançılıq İnstitutu” Beynəlxalq İctimai Təşkilatının prezidenti, Ukrayna Azərbaycanlıları Konqresinin (UAK) Kiyev şəhər təşkilatının sədri, Heydər Əliyev adına Ukrayna-Azərbaycan təhsil, elm, mədəniyyət və idman mərkəzinin qurucusu Oleq Krapivin tərəfindən, Azərbaycanın Kiyevdəki səfirliyinin təşkilati dəstəyi ilə təşkil olunmuşdur.
Moderator, Ukraynanın tanınmış şərqşünas alimi, diplomat Yuri Koçubey UMYİ-nin sədri Viktor Baranova söz vermişdir. V.Baranov tədbiri “Xalqlar dostluğu - ədəbiyyatların dostluğu” adlandırmışdır. 2012-ci ilin Bakı Humanitar Forumunun işində iştirak etmiş və çoxlu azərbaycanlı qələm dostları olan yazıçı Azərbaycandan, ölkənin tərəqqisindən böyük həvəslə danışmış, təqdimatı iki dost dövlətin mədəni həyatında çox mühüm hadisə adlandırmışdır. V.Baranov E.Axundovaya bir dəstə qızıl gül, Azərbaycanın Ukraynadakı səfiri Eynulla Mədətliyə isə “Taras Şevçenkonun rəsmlərindən ibarət albom (1841-1843-cü illər)” təqdim etmişdir.
Azərbaycan səfiri səmimiyyətə və Ukrayna qonaqpərvərliyinə görə UMYİ-yə minnətdarlığını bildirmiş, gözəl söz ustası Elmira Axundovaya təşəkkür etmişdir. Səfir şəxsən tanıdığı Əjdər Xanbabayevi həqiqi vətənpərvər, ləyaqətli insan və tanınmış poliqrafçı adlandırmışdır. Diplomat, həmçinin aprelin 18-də Bakıda E.Axundovanın “Heydər Əliyev. Şəxsiyyət və zaman” 6 cildlik tədqiqat romanının 5-6-cı cildlərinin təqdimatının yüksək səviyyədə keçdiyini xatırlatmış və ona gələcək yaradıcılığında uğurlar arzulamışdır.
Ukraynanın gənclər və idman naziri Ravil Safiullin təqdimatı Ukraynanın və Azərbaycanın ictimai-siyasi həyatında parlaq hadisə adlandırmışdır. O, Azərbaycan xalqının ümummilli lideri Heydər Əliyevin xatirəsinə Ukraynada sərbəst güləş üzrə hər il keçirilən beynəlxalq turnirin sponsoru olan dostu Oleq Krapivinin ünvanına xoş sözlər söyləmişdir.
O, Oleq Krapivinə idmanın və olimpiya hərəkatının inkişafındakı xidmətlərinə görə nazirliyin fəxri fərmanını, fərqlənmə nişanını və “Nike” heykəlini təqdim etmişdir.
Sonra Ukraynanın tanınmış siyasətçisi, Azərbaycanın böyük dostu, “Vətən oğlu” ordeninə layiq görülmüş Anatoli Raxanski ulu öndər Heydər Əliyev haqqında xatirələrini bölüşmüşdür. O qeyd etmişdir ki, Heydər Əlirza oğlu Əliyevin qayğısı sayəsində Kiyevdə “Obolon” pivə zavodu, paytaxt uşaq yeməkləri kombinatı tikilmiş, filarmoniya yenidən qurulmuş və bir çox başqa işlər görülmüşdür.
“Poliqrafçının ölümü” kitabının həmmüəllifi, Azərbaycan Milli Məclisinin deputatı, yazıçı-publisist Elmira Axundovanın çıxışı kitabın təqdimatına yekun vurmuşdur. O, kitabın Ukrayna dilində nəşrinin sponsoru Oleq Krapivinə, Azərbaycanın Kiyevdəki səfirinə səmimi minnətdarlığını bildirərək demişdir ki, bu kitabı ulu öndər Heydər Əliyev çox yüksək qiymətləndirmişdir. E.Axundova qeyd etmişdir ki, bu sənədli-bədii romanda Heydər Əliyevin Azərbaycanda hakimiyyətə qayıtmasından, sovet imperiyasının süqutundan və Heydər Əliyevə yaxın insanlara qarşı fitnəkarlıqlar və qətllər törətmiş keçmiş SSRİ rəhbərliyinin və xüsusi xidmət bölmələrinin çirkin iş metodlarından söhbət açılır. O, vərəqləri saralmış “Literaturnaya qazeta”da dərc olunmuş məqaləni göstərərək demişdir ki, məhz bu məqalədən sonra İsa Nəcəfovla birlikdə bu kitabı yazmağa başlamışlar.
Elmira xanım demişdir ki, kitab 10 xarici dilə tərcümə edilmişdir. Bu kitabın Taras Şevçenkonun dilində nəşr olunması da dərin rəmzi məna daşıyır. O, kitabı Ukrayna dilinə gözəl tərcümə etdiyinə görə Kiyevdə yaşayan həmvətənimiz Mehman Salmanova təşəkkürünü bildirmişdir.
Tədbirin bütün iştirakçılarına kitabın Elmira Axundovanın xatirə sözləri yazılmış nüsxələri təqdim edilmişdir.
Tədbir təntənəli qəbulla başa çatmışdır.
Zeynal Ağazadə
AZƏRTAC-ın xüsusi müxbiri
Kiyev
Bölmənin digər xəbərləri
