Ukrayna mümkün 30 günlük atəşkəs müddətində nəzarət alqoritmi hazırlayan komanda formalaşdırır
Kiyev, 14 mart, AZƏRTAC
Ukrayna mümkün 30 günlük atəşkəsə nəzarət etmək üçün fəaliyyət alqoritmləri üzərində işləyəcək milli komanda formalaşdırmağa başlayıb.
AZƏRTAC xəbər verir ki, bu barədə Ukraynanın xarici işlər naziri Andrey Sibiqa mətbuat konfransında məlumat verib. O qeyd edib: “Biz artıq mümkün atəşkəsə düzgün nəzarət etmək üçün müvafiq fəaliyyət alqoritmləri hazırlayacaq milli komanda formalaşdırmağa başlamışıq. Bu, son dərəcə mürəkkəb prosesdir”.
Nazir əlavə edib ki, cəbhə xətti bu gün 1300 kilometrdən artıqdır. Xüsusilə, Ukrayna Minsk prosesi çərçivəsində atəşkəs rejiminin 25 dəfə pozulduğu mənfi təcrübəyə malikdir.
“Buna görə də indi hər şey Ukrayna tərəfinin müvafiq komandalar, inkişaflar və üsullarla hazır olmasını təmin etməyə yönəldiləcək. Mən başqa şeylərlə yanaşı, Ukrayna üçün ədalətli sülhə nail olmaq üzrə saziş və ya fəaliyyət planı ilə bağlı gələcək baxışı nəzərdə tuturam. Əlbəttə, Ukraynaya veriləcək təhlükəsizlik təminatı paketinin parametrləri və həcmi də buraya aiddir”, -deyə o bildirib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
