UN-Habitat rəsmisi: Mənzil məsələsi qlobal inkişaf gündəliyinin əsas prioritetidir
Bakı, 22 may, AZƏRTAC
UN-Habitat-ın 2026–2029-cu illər üzrə strategiyası qlobal inkişaf gündəliyində mənzil məsələsini əsas prioritetlərdən biri kimi müəyyənləşdirir. Bu ambisiyalı strategiya qlobal mənzil böhranı ilə yanaşı, yoxsulluq, bərabərsizlik, iqlim dəyişiklikləri və müxtəlif böhranların yaratdığı çağırışların həllini hədəfləyir.
AZƏRTAC xəbər verir ki, bu sözləri UN-Habitat-ın Çin Ofisinin baş müşaviri Canq Çjenşan BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində təşkil olunan “Gələcək üçün binalar - rəqəmsal innovasiya vasitəsilə iqlim-mənzil əlaqəsinin inkişafı” adlı tədbirdə söyləyib.
O bildirib ki, strategiyanın əsas missiyası adekvat mənzilə, torpağa və əsas xidmətlərə çıxışın genişləndirilməsidir.
“Gələcək üçün binalar yaşıl və aşağıkarbonlu olmalıdır. Statistikaya görə, tikinti sektoru qlobal enerji istehlakının təxminən 22 faizini və karbon qazı emissiyalarının 34 faizini təşkil edir. Buna görə də şəhərlərin necə layihələndirilməsi, necə tikilməsi və bəzi hallarda necə yenidən qurulması məsələlərinə ciddi yanaşmaq lazımdır”, - deyə Canq Çjenşan qeyd edib.
Bölmənin digər xəbərləri
