“Uşaqlarımız Qarabağda böyüyəcək…” – Talışdan reportaj
Talış, 23 yanvar, Tahir Ağaməmmədov, AZƏRTAC
İşğaldan azad edilmiş Talış kəndində həyat öz axarı ilə davam edir. Birinci mərhələdə kənddə 20 ev, 10 qeyri-yaşayış və ictimai iaşə obyekti bərpa edilərək yenidən qurulub. Kənddaxili yolların inşası həyata keçirilib, yaşıllıqlar salınıb, dekorativ ağaclar, kollar, güllər əkilib. Kommunikasiya xətləri yenidən qurulub, yeni qaz xətti çəkilib. Bir sözlə, ötən ilin mart ayından kəndə köçürülən sakinlərin rahat və firavan yaşayışı təmin edilib.
AZƏRTAC-ın bölgə müxbiri Talış kəndinə gedərək Aslanovlar ailəsinin qonağı olub.
Ailə başçısı Taleh Aslanov deyir ki, çətinliklə keçən 30 illik köçkünlük həyatından sonra indi Talış kəndində rahat, firavan yaşayırlar. “Torpaqlarımız işğal olunandan sonra Bərdə rayonunun Şorəlli kəndində xəstəxana binasında məskunlaşmışdıq. 30 il çox çətinliklər gördük, şəraitsiz binada yaşamalı olduq.
2020-ci il bütün xalqımız üçün olduqca uğurlu oldu. 44 günlük Vətən müharibəsində Ordumuz qalib gəldi, torpaqlarımız işğaldan azad edildi. Ən böyük arzumuz gerçəkləşdi… Nəhayət, ötən ilin martında Novruz bayramından bir neçə gün əvvəl Talış kəndinə köçdük, burada evlə təmin olunduq. Novruz bayramı bizim üçün ikiqat sevincli oldu. Beləliklə, 30 illik köçkünlük həyatı başa çatdı, doğma torpaqlarımızda yeni - firavan günlərimiz başladı”.
T.Aslanov Talışdakı yeni həyatlarından bəhs edərək deyib: “Evimiz üçotaqlıdır, hər cür şəraiti var - fasiləsiz qaz, elektrik enerjisi, rabitə ilə təmin olunub. Həyətimizdə alma, armud, heyva, tut, nar, narıngi ağacları var. Həmçinin müxtəlif tərəvəzlər - pomidor, badımcan, qarğıdalı, göy-göyərti becəririk. Uşaqlarımız məktəbə gedir. Qızım dördüncü, oğlum isə ikinci sinifdə oxuyur. Mən işləyirəm, həyat yoldaşım da kənddəki uşaq bağçasında işlə təmin olunub. Biz sözlə, hər şey yaxşıdır. Ən əsası isə odur ki, illərdir həsrətində olduğumuz Qarabağımızdayıq. Çox sevinirəm ki, uşaqlarımız burada böyüyəcək”.
Ailənin böyük övladı Qönçə ilə söhbət edirik. O, atasının Qarabağ haqqında danışdıqlarını həmişə maraqla dinlədiyini bildirir: “Atam tez-tez Qarabağ haqqında, buranın təbiəti, dağları, bu yerlərdə keçirdikləri gözəl günlər barədə danışır. Onun Qarabağla bağlı dediklərini maraqla dinləyir, ürəyimdə arzular qururdum. Həmişə istəyirdim ki, torpaqlarımız azad olunsun, atamın bəhs etdiyi o dağları, meşələri mən də görüm”.
Artıq Qönçənin arzusu gerçəkləşib. İndi isə onun ən böyük istəyi böyüyəndə həkim olub, kəndlərində işləməkdir. “Dərslərimi yaxşı oxuyuram. Böyüyəndə həkim olub, kəndimizdə işləmək istəyirəm”, - deyə Qönçə arzusunu söyləyir.
Ailənin xanımı Tükəzban Mustafayeva da ötən illərin bir-birindən uğurlu olduğunu söyləyir: “Şükürlər olsun Allaha, illərimiz bir-birindən uğurlu olur. Keçən il Talış kəndində məskunlaşdıq. Artıq bizim də evimiz var. Kənddə sakinlər üçün hər cür şərait yaradılıb. Gündəlik həyatımızı yaşayırıq. Hər səhər uşaqlar məktəbə, biz işə gedirik. Hər şeydən razıyıq. Bundan artıq nə istəyə bilərik? Gələn ay ölkəmizdə prezident seçkiləri keçiriləcək. Bu seçkilər də bizim üçün əlamətdar olacaq. Çünki, azad edilmiş ərazilərə köçmüş sakinlər olaraq səsvermədə iştirak edəcəyik. Allah dövlətimizi hər zaman qüdrətli eləsin”.
Bölmənin digər xəbərləri
