İDMAN
Uşu və muay-tay üzrə Bakı birinciliyinin qalibləri müəyyənləşib
Bakı, 26 iyul, AZƏRTAC
Şəhid jurnalistlər - AZƏRTAC-ın müxbiri Məhərrəm İbrahimovun və Azərbaycan Televiziyasının videooperatoru Sirac Abışovun xatirəsinə yeniyetmələr və gənclər arasında uşu və muay-tay üzrə Bakı birinciliyinin qalibləri müəyyənləşib.
AZƏRTAC xəbər verir ki, Bakı Şəhər Gənclər və İdman Baş İdarəsinin və Azərbaycan Döyüş Federasiyaları Assosiasiyasının birgə təşkilatçılığı ilə baş tutan yarışa 180-ə yaxın idmançı qatılıb.
Abşeron Olimpiya İdman Kompleksində təşkil olunan uşu yarışlarında “Arktika Abşeron” bütün komandaları qabaqlayaraq medal sayına görə birinci olub. İkinci pillədə “Məhəmmədi Anar”, üçüncü pillədə isə “Cəngavər” klubu qərarlaşıb.
Muay-tay yarışlarında isə “Bozqurd” birinci, “İnam” ikinci, “Laçın” klubları isə üçüncü olublar.
Qeyd edək ki, turnirdə ümumilikdə 20-dən çox idman klubu iştirak edib.