Üzümçülüyün inkişafına dair Dövlət Proqramı bölgələrin sosial-iqtisadi yüksəlişi üçün yeni perspektivlər açmışdır
İsmayıllı, 22 may (AZƏRTAC). Ötən əsrin 80-ci illərində İsmayıllı respublikamızın iri üzümçülük rayonlarından hesab olunurdu. Həmin vaxt rayonda 9228 hektar bar verən üzüm plantasiyası mövcud idi. Təkcə 1984-cü ildə rayonda hər hektardan 87,07 sentner olmaqla ümumilikdə 80346 ton məhsul istehsal edilmişdi.
Məhz o illərdə Azərbaycanın digər üzümçülük bölgələri kimi, İsmayıllı da əsl çiçəklənmə dövrünü yaşayırdı. Bu çiçəklənmə, əlbəttə, təsərrüfatın bu gəlirli sahəsindən qazanılan külli miqdarda vəsaitin hesabına idi. O illərdə rayon mərkəzi və kəndlər abadlaşır, insanlar varlanırdılar.
Bütün bunlara dahi dövlət xadimi, ümummilli liderimiz Heydər Əliyevin uzaqgörən siyasətinin, gərgin zəhməti sayəsində nail olunmuşdu. Ulu öndər ötən əsrin 70-ci illərində Azərbaycan KP MK-nın birinci katibi vəzifəsində çalışarkən respublikamızın iqtisadiyyatında üzümçülüyün müstəsna əhəmiyyətini yüksək qiymətləndirərək bu sahənin inkişafını daim diqqət mərkəzində saxlayırdı.
Təəssüf ki, 80-ci illərin ikinci yarısından başlayaraq keçmiş Sovet İttifaqının rəhbərliyi tərəfindən alkoqolizmə qarşı mübarizə adı altında aparılan kampaniya çərçivəsində Azərbaycanda böyük zəhmət bahasına salınmış üzüm bağları məhv edilərək iqtisadiyyata ciddi ziyan vurulmuş, milyonlarla insan əsas gəlir mənbəyindən məhrum edilmişdir. O vaxt Nikitin adına kolxoz istisna olmaqla İsmayıllı rayonunda da bütün üzüm bağları demək olar ki, məhv edildi.
Üzümçülüyün və şərabçılığın Azərbaycan iqtisadiyyatı üçün böyük əhəmiyyətini həmişə yüksək qiymətləndirən ulu öndər Heydər Əliyev xalqın təkidli tələbi ilə ikinci dəfə hakimiyyətə gəldikdən sonra bu məsələ yenidən gündəmə gətirildi. Elə o vaxtdan təsərrüfatın bu sahəsinin inkişafı üçün əlverişli şərait yaradıldı və bu istiqamətdə tədbirlərə başlanıldı. 2012-ci ildə “Üzümçülük və şərabçılıq haqqında” Azərbaycan Respublikasının Qanunu qəbul olundu.
Bu gün ulu öndərin layiqli davamçısı Prezident İlham Əliyev ölkədə üzümçülüyün inkişafına mühüm əhəmiyyət verir. Azərbaycan Prezidentinin təşəbbüsü və birbaşa rəhbərliyi ilə qəbul edilmiş regionların sosial-iqtisadi inkişafına dair 2004-2008 və 2008-2012-ci illəri əhatə edən birinci və ikinci Dövlət Proqramları çərçivəsində bu sahənin inkişafı istiqamətində mühüm irəliləyişlərə nail olunmuşdur.
Dövlətimizin başçısının 2011-ci il 15 dekabr tarixli Sərəncamı ilə təsdiq edilmiş “2012-2020-ci illərdə Azərbaycan Respublikasında üzümçülüyün inkişafında dair Dövlət Proqramı” ölkəmizdə qədim və ənənəvi istehsal sahəsi olan üzümçülüyün əvvəlki şöhrətinin qaytarılmasında mühüm rol oynayacaqdır.
Bu mühüm sənəd respublikamızın hər yerində olduğu kimi, İsmayıllıda da böyük bir canlanmaya səbəb olmuşdur. Rayonda artıq Dövlət Proqramının əhatə etdiyi illərə müvafiq olaraq üzüm əkini proqnozu tərtib edilmişdir. Hazırda rayonda plantasiyaların sahəsi 848 hektara çatdırılmışdır. Ötən təsərrüfat ilində texniki və süfrə sortları olmaqla 21 hektarda yeni bağlar salınmışdır. Bu sahəyə diqqətin artırılmasının nəticəsidir ki, 2011-ci ildə rayonda 2169 ton üzüm istehsal edilmişdir.
Plantasiyalarda aqrotexniki tədbirlərin, xəstəlik-zərərvericilərə qarşı mübarizə işlərinin həyata keçirilməsi üçün texnikaya, əkin materiallarına, dəmir-beton dayaqlara, məftilə, dərman preparatlarına olan tələbat müəyyənləşdirilərək müvafiq təşkilatlarla əlaqələr yaradılmışdır.
Cari il fevralın 17-də Sahibkarlığa Kömək Milli Fondunun və rayon icra hakimiyyətinin birgə təşkilatçılığı ilə fermerlərin, iş adamlarının, üzümçülüyə marağı olan fiziki şəxslərin, habelə mütəxəssislərin iştirakı ilə seminar-müşavirə keçirilmişdir. Burada üzümçülük sahəsində çalışanlara lazımı dövlət dəstəyinin göstəriləcəyi, ehtiyac yarandıqda onların kreditlə təmin olunacağı bildirilmişdir.
Yaxın gələcəkdə İsmayıllıda üzüm emalı üçün illik istehsal gücü 5000 ton olan iki zavodun tikintisi və bir müəssisənin yenidən qurulması da nəzərdə tutulmuşdur.
Üzümçülüklə əlaqədar Dövlət Proqramı rayonda iqtisadiyyatın bu gəlirli sahəsinin sürətli inkişafını təmin edəcək, İsmayıllı üzümünün əvvəlki şöhrətini özünə qaytaracaqdır. Mütəxəssislərin əminliklə söylədikləri bu fikir artıq bir reallıqdır. Bu reallıq bölgənin sosial-iqtisadi həyatını, insanların həyat tərzini kökündən yaxşılaşdıracaqdır.
Bölmənin digər xəbərləri
