Bakı, 11 noyabr, AZƏRTAC

Artıq üç ildir ki, Azərbaycanda yaşayıram və burada keçirilən COP29 kimi mötəbər beynəlxalq tədbirə hazırlıqları izlədikcə, ölkənin iqlimlə bağlı göstərdiyi səylərə və ayrılan vaxta heyran qaldım. Hər detalın diqqətlə nəzərdən keçirilməsi, bütün infrastrukturun təkmilləşdirilməsi Azərbaycanın bu mühüm tədbirə necə önəm verdiyini sübut edir.

Bu sözləri AZƏRTAC-a açıqlamasında COP29-da iştirak edən Cənubi Afrika Respublikasından olan xanım iştirakçı Vander Groeben söyləyib.

COP29-un təşkil olunmasının Azərbaycanın beynəlxalq arenada tanıdılmasına kömək edəcəyini diqqətə çatdıran Vander Groeben bildirib: “Təəssüf ki, çox insan hələ də Azərbaycanı Asiya regionunda olan bir ölkə kimi tanımır. Belə mötəbər tədbirlər məhz bu boşluğu dolduracaq, ölkənin turizm cəlbediciliyini artıracaq. Belə ki, tədbirdə iştirak edənlər, habelə media vasitəsilə Azərbaycan haqqında məlumatı olanlar ölkəyə səfər etmək istəyəcəklər. Digər tərəfdən, COP29-un ekoloji dayanıqlıq sahəsində də əhəmiyyətli bir təsir göstərəcəyinə inanıram”.

Dünyada təbiətin və ya ekosistemlərin qorunmasının mühüm bir vəzifə olduğunu deyən qonaq əlavə edib: “COP29 tədbiri zamanı bu sahədə müxtəlif biliklərin paylaşılması yerli əhali üçün də dəyərli təcrübə olacaq. Azərbaycan xalqı bu tədbir vasitəsilə qlobal ekoloji problemlər haqqında daha çox məlumat əldə edəcək və davamlı inkişaf məqsədlərinin əhəmiyyətini daha dərindən qavrayacaq. Mən əslən Cənubi Afrikadanam, lakin üç ildir Azərbaycanda yaşayıram. Burada keçirilən belə bir tədbirin həm ölkə üçün, həm də beynəlxalq cəmiyyət üçün nə qədər dəyərli olduğunu bir daha vurğulamaq istəyirəm”.