İQTİSADİYYAT
VERGİLƏR NAZİRLİYİNDƏ SEÇMƏ İMTAHANLARI KEÇİRİLƏCƏK
Dekabrın 16-dan Vergilər Nazirliyində ləğv olunmuş 62 ərazi vergi idarəsinin və onlara təhkim edilmiş şəhər və rayon vergi idarələrinin işçiləri üçün seçmə imtahanları başlanacaqdır.
Nazirliyin hüquqi təminat şöbəsinin müdiri Xəyal Babayev bununla əlaqədar dekabrın 11-də keçirilmiş mətbuat konfransında bildirmişdir ki, imtahanlar nəticəsində 1600 əməkdaşdan 718-i yeni yaradılan 12 ərazi vergi idarəsində işləmək üçün seçilməlidir. Bundan ötrü nazirin əmri ilə komissiya yaradılmışdır. Komissiya yeni idarələrin kadrlarla təmin edilməsi məsələləri ilə məşğul olacaqdır.
İmtahan verənlər kompüter proqramında qeydiyyatdan keçdikdən sonra, nazirlik aparatının mütəxəssisləri tərəfindən hazırlanmış və “Vergilər” qəzetinin xüsusi buraxılışında, habelə “Respublika” qəzetində dərc edilmiş sualları cavablandıracaqlar. Cəmi 1155 sual var, lakin kompüterin bir namizəd üçün ixtiyarı surətdə seçdiyi 75 suala cavab vermək lazım gələcəkdir. Nazirlik mütəxəssislərinin fikrincə, bu üsul tam ədaləti təmin etməyə və işçilərin peşəkarlıq səviyyəsini müəyyənləşdirməyə imkan verəcəkdir.
İmtahanlara gələn il yanvarın 10-dək yekun vurulacaqdır.