CƏMİYYƏT
Vətən Müharibəsi Qəhrəmanı: Torpağa, xalqa, dövlətçiliyə bağlı olmaq ən ümdə vəzifələrdəndir
Bakı, 28 iyun, AZƏRTAC
Ermənistan silahlı birləşmələrinin başladığı təxribatların qarşısının alınması məqsədilə 2020-ci il sentyabrın 27-də səhər saatlarından Azərbaycan Ordusuna “İrəli” komandası verildi və Horadiz qəsəbəsi, Lələtəpə xəttindən əks-hücum əməliyyatlarına başladıq. Düşmənin ön xəttini yararaq hücumu davam etdirdik. 44 gün ərzində hər gün yalnız irəli gedərək yeni-yeni mövqeləri azad etdik. Savaşın sonuncu gününədək vuruşduq. Çünki düşmənə döyüş meydanında gücümüzü göstərməyə hazır idik və Ordumuzun hərbi qulluqçuları Ali Baş Komandanın bu əmrini səbirsizliklə gözləyirdi. Nəhayət ki, həmin gün yetişdi. Komandirlik etdiyim “N” saylı hərbi hissənin əsgər və zabitləri Vətən müharibəsində onlara verilən bütün tapşırıqları uğurla yerinə yetirdi və hər biri böyük qəhrəmanlıq nümunələri göstərdilər. Azərbaycan Ordusu gücünü ilk gündən nümayiş etdirdi.
Bu barədə Azərbaycan Ordusunun zabiti, Vətən Müharibəsi Qəhrəmanı, polkovnik Nizami Mövlanov AZƏRTAC-a açıqlamasında deyib.
Qəhrəman zabit onun rəhbərlik etdiyi briqadanın Şuşakənd istiqamətində gedən döyüşlərdə iştirak etdiyini diqqətə çatdırıb: “Şuşanın düşmən tapdağından xilas edilməsi əməliyyatında rəhbərlik etdiyim briqada Şuşakənd yönündə hərəkət edirdi. Ermənilərin Qarabağdakı ən böyük döyüş sursatı anbarını ələ keçirdik və hücumu Xankəndi istiqamətində davam etdirdik. Həmin həftə hücumu atəşkəsdən sonra dayandırdıq.
Azad etdiyimiz torpaqlarda indi gəzərkən orada şəhidlərimizi dərin hüznlə anır, döyüşçülərimizi daim xatırlayıram. O günlərə dair xoş xatirələr, kədərli anlar da gözümün qarşısından keçir. Döyüş zamanı şəxsi heyətimizin göstərdiyi şücaət, qəhrəmanlıqlar yadıma düşəndə həm təsirlənir, həm də qürrələnirəm. Qəhrəman döyüşçüləri itirməyin ağrı-acısını ömrü boyu qəlbimizdə daşıyacağıq. Yeganə təsəllimiz uğrunda döyüşdüyümüz torpaqlarımızın azad edilməsidir. Ona görə də həmin torpaqlara ayaq basdıqca şəhidlərimizi dərin ehtiramla yad edir, onlara minnətdarlığımızı bildiririk.
Heydər Əliyev adına Hərbi İnstitutda kursantların vətənpərvər ruhda yetişdirilməsində əlimizdən gələni əsirgəmirik
2021-ci ilin iyunundan Heydər Əliyev adına Hərbi İnstitutda rəis müavini vəzifəsində xidmət etdiyini bildirən Nizami Mövlanov deyib ki, həmin institutda gələcəyin kursantların vətənpərvər, cəsur hərbçi kimi yetişdirilməsində əlindən gələni əsirgəmir: “Biz kursantlarımıza qəhrəman şəhidlərimizin şərəfli həyat və döyüş yolunu təbliğ edir, onlara Vətənə, xalqa, dövlətçiliyə bağlı olmağı, daim doğma torpağın keşiyində ayıq-sayıq dayanmağın ən vacib vəzifələrdən biri olduğunu aşılayırıq. Xidmət etdiyim hərbi təhsil müəssisəsində 22 ixtisas üzrə zabit yetişdirilir. Müxtəlif bölgələrdə Azərbaycan Ordusunda qulluq edəcək gələcəyin zabitlərinin ixtisaslı hərbçilər kimi hazırlanmasına çalışırıq.
Bu gün Azərbaycan Ordusu Ali Baş Komandanın göstərişi ilə Türkiyə modelinə keçib. Yəni Azərbaycan Silahlı Qüvvələri Türkiyə ordusu və oradakı təhsil sistemi ilə eyniləşir. Bununla yanaşı, Ordumuz dünyada qabaqcıl dövlətlərin təcrübəsindən faydalanır. Onların yaxşı cəhətlərini seçərək gələcəyimizin zabitlərinin daha bacarıqlı yetişməsinə səy göstəririk. Həmişə çalışırıq ki, onlar həm də intellektual səviyyədə yetişsinlər, cəmiyyətə və xalqımıza faydalı olsun və inkişaf etsinlər.
İyunun 26-da Azərbaycan Silahlı Qüvvələrinin yaranmasının 105 illiyi tamam oldu. İkinci Qarabağ müharibəsinə qədər “Kaş gələn Silahlı Qüvvələr Gününü işğaldan azad olan torpaqlarımızda qeyd edək”, - deyə arzulayırdıq. Bu gün biz artıq həmin ərazilərdəyik və 105 illiyimizi Qalib Ordunun hərbi qulluqçuları kimi qürurla qeyd edirik".
Azərbaycan Ordusu torpaqlarımızı hərb yolla azad etməyə hər zaman hazır idi
Nizami Mövlanov bildirib ki, Ümummilli Lider Heydər Əliyev yenidən hakimiyyətə qayıtdıqdan sonra ordu quruculuğu istiqamətində islahatlar aparıldı, orduda təşkilatlanma həyata keçirildi. Yəni yeni hərbi hissələr, ordu korpusları yaradıldı və komandir heyəti təlim-tədrisə cəlb edildi. Yeni komandirləri yetişdirmək üçün hərbi məktəblərdə tədris bazası yenidən yaradıldı və Azərbaycan Ordusu inkişaf etməyə başladı. Prezident İlham Əliyevin bu sahədə həyata keçirdiyi tədbirlər müstəsna əhəmiyyətə malikdir. Dünyanın ən güclü orduları sırasında yer alan Azərbaycan Ordusu torpaqlarımızı hərb yolu ilə azad etməyə hər zaman hazır idi. Həmin zaman yetişəndə isə Ordumuza cəmi 44 gün vaxt lazım oldu. İllərin keçilməz istehkamlarını qısa müddətdə yaran Azərbaycan Ordusu üçrəngli bayrağı Şuşada dalğalandırmağa nail oldu. Azərbaycan Ordusunun müasir döyüş taktikası və xüsusilə, Şuşanın azad edilməsi əməliyyatı dillərə dastan oldu.
Vətən müharibəsində hərbi qulluqçularımızın igidliklərindən danışan polkovnik döyüşdəki maraqlı məqamlardan da bəhs edib: "Müharibə zamanı hərbi qulluqçularımız çoxsaylı qəhrəmanlıq nümunələri göstərdilər. Düşmən bizə müqavimət göstərə bilmirdi və mövqelərini qoyub qaçırdı. 44 günlük savaş ərzində döyüşün ilk günündən son anınadək döyüş meydanında olduq. O zaman mən briqada komandiri idim. Hazırda AZƏRTAC-da çalışan Vətən müharibəsi iştirakçısı Mehrac Ağasıyev əsgərim olub. Hər kəsin məqsədi, amalı bir idi: Vətən torpağını işğaldan azad edək, nəsib olarsa, evimizə üzüağ qayıdaq. O zaman hər bir hərbi qulluqçu yalnız Qələbəyə köklənmişdi. Ən çox yadda qalan məqamlar 30 illik istehkamları yaranda oldu. Biz döyüşə Lələtəpə istiqamətindən daxil olmuşduq. Düşmən azad etdiyimiz əraziləri bizdən geri almağa cəhd edirdi. Lakin onlar nə qədər cəhd etsələr də, daha çox itki verib geri çəkildilər. Sonuncu düşmən səngərinə kimi şəxsi heyət dayanmadan döyüşürdü. Yəni elə bil əsgərlərimiz həmin günü gözləyirdi. “İrəli” komanda verməzdən, atəş hazırlığı gedəndən əvvəl belə hətta görürdük ki, artıq şəxsi heyət döyüşdə ön xətti keçib. Yəni yaxşı silah, müasir texnika ola bilər, lakin əsas məsələ onu idarə edə bilən, yaxud ondan atəş aça bilən peşəkar hərbi qulluqçunun olmasıdır. Bax, biz bu uzun illər ərzində hərbi qulluqçuların peşəkar olması üçün çalışdıq. Əziyyətimizin bəhrəsini Vətən müharibəsində gördük. Biz Cəbrayılın Nüzgar kəndi uğrunda dörd gün ancaq əks-hücum dəf etmişik. Düşmən bütün günü əks-hücum edərək bizi kənddən çıxarmağa çalışsa da, buna nail olmadı. Hər əks-hücumu uğurla dəf edərək irəlilədik. Son nəticədə Ordumuz öz missiyasını yüksək səviyyədə yerinə yetirərək Şanlı Qələbə qazandı".
Polkovnik Nizami Mövlanov Cəbrayıl, Füzuli rayonunun bir sıra kəndlərinin, Xocavənd rayonunun Hadrut qəsəbəsinin, Tuğ və Domu kəndlərinin və Şuşa şəhərinin azad edilməsi uğrunda gedən döyüşlərdə qəhrəmanlıq göstərib.
Prezident İlham Əliyevin 2020-ci il 9 dekabr tarixli Sərəncamına əsasən Nizami Mövlanova “Vətən Müharibəsi Qəhrəmanı” adı verilib.
Dövlətimizin başçısının müvafiq sərəncamları ilə igid zabitimiz “Cəbrayılın azad olunmasına görə”, “Füzulinin azad olunmasına görə”, “Xocavəndin azad olunmasına görə”, “Şuşanın azad olunmasına görə”, “İgidliyə görə”, eləcə də Azərbaycan Prezidenti adından müdafiə nazirinin əmrləri ilə 1-ci, 2-ci və 3-cü dərəcəli “Qüsursuz xidmətə görə” və digər medallarla da təltif edilib.
Xatırladaq ki, Prezident İlham Əliyevin müvafiq Sərəncamı ilə 83 nəfər Vətən Müharibəsi Qəhrəmanı adı ilə təltif olunub. Onlardan 34 nəfəri ölümündən sonra bu ada layiq görülüb.