Vətən müharibəsinin gəncəli iştirakçıları Gənclər Günü münasibətilə təltif olunublar
Gəncə, 2 fevral, Rauf Hacıyev, AZƏRTAC
Gəncə Şəhər İcra Hakimiyyətinin dəstəyi, Gənclər Evinin, həmçinin şəhər gənclər və idman baş idarəsinin birgə təşkilatçılığı ilə Gənclər Gününə həsr olunan tədbir keçirilib.
AZƏRTAC xəbər verir ki, karantin rejiminin qaydalarına uyğun olaraq tədbir Gəncə Gənclər Evinin qarşısında açıq hava şəraitində təşkil olunub.
Tədbirdə Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki baş konsulu Zeki Öztürk və fəal gənclər iştirak ediblər.
Azərbaycanın Dövlət Himninin səslənməsi ilə başlayan tədbirdə Vətən müharibəsi zamanı şəhid olanların xatirəsi bir dəqiqəlik sükutla yad edilib.
Daha sonra şəhər rəsmiləri Gənclər Evinin istedadlı gənclərinin əl işlərindən ibarət sərgiyə baxış keçiriblər. Sərgidə Vətən müharibəsi şəhidlərinin rəsmiləri, habelə “Nizami Gəncəvi İli” ilə bağlı əl işləri nümayiş olunub.
Tədbirdə şəhər icra hakimiyyətinin başçısı Niyazi Bayramov ölkəmizdə həyata keçirilən gənclər siyasətindən danışıb. Bildirib ki, Ümummilli Liderin əsasını qoyduğu siyasət bu gün davam etdirilir. Prezident İlham Əliyevin rəhbərliyi ilə gənclərin fərdi inkişafına təkan verən dövlət proqramları həyata keçirilir. Azərbaycan gəncləri ölkə həyatının bütün sahələrində təmsil olunur və özlərini doğruldurlar.
Qeyd edilib ki, 44 günlük Vətən müharibəsində qələbəmizi təmin edən gənc nəsil ən yüksək vətənpərvərlik hisslərinə malikdir.
Gəncə Şəhər Gənclər və İdman Baş İdarəsinin rəisi Həmid Nəsirov 2020-ci ildə gənclərlə iş və idman sahəsində həyata keçirilən layihələrdən söz açıb, əldə olunan uğurlardan danışıb. Bildirilib ki, həyata keçirilən bütün tədbirlər xüsusi karantin rejiminin tələblərinə uyğun olaraq reallaşıb. 44 günlük müharibə zamanı Ermənistanın Gəncəni raket atəşinə tutması nəticəsində terror qurbanı olan mülki şəxslərin tanıdılması və təbliğatında gənclərin çox böyük rolu olub.
Çıxış edənlər Azərbaycan gəncliyinə göstərilən böyük qayğı və diqqətə görə Prezident İlham Əliyevə və birinci xanım Mehriban Əliyevaya dərin təşəkkürlərini bildiriblər.
Tədbirdə bir qrup gənc Gəncə şəhərinin ictimai həyatında fəal iştirakına və gənclərlə iş sahəsində səmərəli fəaliyyətinə görə fəxri fərmanla təltif olunub.
Qeyd edək ki, təltif olunanlar sırasında Vətən müharibəsi iştirakçıları da yer alıb.
Tədbirin sonunda 2021-ci ilin “Nizami Gəncəvi İli” elan edilməsi ilə əlaqədar olaraq dahi şairin “Xəmsə”sini simvolizə edən 5 çinar ağacı əkilib.
Bölmənin digər xəbərləri
