VOLFQANQ VİSLOZİL: AzərTAc-ın LAYİQLİ YERİ AVROPA XƏBƏR AGENTLİKLƏRİ AİLƏSİNDƏDİR
Müsahibimiz Asiya və Sakit Okean Ölkələri Xəbər Agentlikləri (OANA) Təşkilatı İcraiyyə Komitəsinin AZƏRTAC-ın təşəbbüsü ilə Bakıda keçirilmiş 30-cu iclasının iştirakçısı, Avropa Xəbər Agentlikləri Alyansının (EANA) və Avropada nüfuzlu xəbər agentliklərindən biri sayılan Avstriya Mətbuat Agentliyinin (APA) prezidenti doktor Volfqanq Vislozildir.
Azərbaycana ilk dəfə səfər edən cənab Volfqanq Vislozil xüsusi müxbirimizə müsahibəsində səfər təəssüratını, EANA ilə AZƏRTAC arasında əməkdaşlığın perspektivləri barədə fikirlərini bölüşmüşdür.
-Cənab doktor Vislozil, ilk növbədə, OANA İcraiyyə Komitəsinin Bakıda keçirilmiş 30-cu iclası haqqında fikirlərinizi bilmək istərdik.
-AZƏRTAC-ın təşəbbüsü ilə gerçəkləşən iclas təmsil etdiyim təşkilatın nümayəndəsi qismində iştirak etdiyim OANA-nın ilk tədbiri idi. Onilliklərdən bəri xəbər agentliyində çalışmağıma və OANA barədə kifayət qədər məlumata malik olmağıma baxmayaraq, Bakıya səfərim sayəsində ilk dəfə həmin təşkilatla yaxından tanış oldum və onun üzvlərinin təmsilçiləri ilə görüşmək imkanı əldə etdim. Müxtəlif ölkələri təmsil edən agentliklərin nümayəndələri ilə görüşmək, onlarla fikir mübadiləsi aparmaq mənə bu sahədə öz təcrübəmi zənginləşdirməyə imkan yaratdı və ev sahibi kimi AZƏRTAC-ın mükəmməl şəkildə təşkil etdiyi toplantıdan xoş təəssüratlarla ayrıldım.
-Bakıda olduğunuz müddətdə bir çox insanlarla təmasda oldunuz, Azərbaycan Prezidenti İlham Əliyevlə görüşdünüz. Bu barədə təəssüratlarınız necədir?
-Cənab Prezidentlə görüş mənim üçün xoş sürpriz oldu. Onun mükəmməl səviyyədə ingiliscə danışması, suallara verdiyi məntiqi cavablar, ölkənin geosiyası vəziyyəti və qonşuları ilə münasibətləri barədə söylədiyi fikirlər məndə dərin təəssürat doğurdu.
-Bu, Sizin Azərbaycana ilk səfəriniz idi. Səfərdən öncə ölkəmiz haqqında təsəvvürünüz necə idi və sonra hansı təəssüratlar yarandı?
-Etiraf etməliyəm ki, səfərdən öncə Azərbaycan barədə məlumatım o qədər də dərin deyildi, bu səbəbdən də hazırda dünyanın ən həssas regionlarından birində yerləşən və getdikcə geosiyasi və iqtisadi baxımdan əhəmiyyəti artan ölkəni görməyə can atırdım. Azərbaycanın neft ölkəsi olduğunu bilsəm də, o, məni öz iqtisadiyyatı, tarixi keçmişi, zəngin mədəniyyəti, xüsusilə də musiqisi ilə heyran qoydu. İnanıram ki, Bakıda gedən intensiv tikinti işləri ən yaxın illərdə şəhərə başqa bir görkəm verəcəkdir.
-Azərbaycanın bölgələrindən biri ilə tanışlıq da çox güman ki, ölkəmiz haqqında təsəvvürlərinizi dərinləşdirməyə imkan verdi.
-Sözsüz ki, səfər etdiyimiz Xızı bölgəsi bizim üçün çox maraqlı oldu. Tamamilə yaşıllıq içərisində olan və əsrarəngiz təbiətə malik bu bölgədə geniş turizm potensialı vardır. Biz yolboyu, eləcə də həmin rayonda bir sıra infrastruktur layihələrinin gerçəkləşdirilməsinin, yeni yolların salınmasının və turizm mərkəzləri tikilməsinin şahidi olduq.
-Siz AZƏRTAC-ın EANA-ya üzv seçilməsində böyük rolu olan şəxs kimi tanınırsınız. AZƏRTAC-ın bu təşkilatla qarşılıqlı əməkdaşlığının perspektivlərini necə görürsünüz?
-Mən bu məsələdə böyük perspektivlər görürəm və çox aydın təsəvvürüm var. EANA-ya üzv olmaq imkan verəcək ki, təcrübə və bilik transferi baş versin, yeni texnologiyalarla tanış olmaq imkanı əldə edilsin və agentliklər bir-birinə qarşılıqlı dəstək olsunlar. Bu səbəbdən də AZƏRTAC-ın baş direktoru cənab Aslan Aslanovu Vyanaya dəvət etdim və tezliklə rəhbərlik etdiyim agentliklə onun yaxından tanış olması arzusundayam.
Özünü Avropanın bir hissəsi hesab edən və Avropaya inteqrasiyaya üstünlük verən bir ölkənin agentliyi kimi AZƏRTAC-la uzun müddətə düşünülmüş geniş əməkdaşlıq imkanları vardır. Bir fikri aprel ayında Tallinndə keçirilmiş iclasda da demişdim ki, Avropanın sərhədləri Ural dağları ilə məhdudlaşmır, Avropanın bir hissəsi olan Azərbaycanın bu agentliyinin ən layiqli yeri Avropa xəbər agentlikləri ailəsindədir və biz qapılarımızı mütləq onun üzünə açmalıyıq. Ötən əsrin 90-cı illərində Şərqi Avropa ölkələri agentliklərinin EANA-ya üzv qəbul edilməsi onlara öz strukturlarını, texniki təchizat və texnologiyalarını təkmilləşdirməyə şərait yaratdı. Ümid edirəm ki, EANA-ya üzv olmaqla AZƏRTAC üçün də yeni imkanlar yaranacaq, Avropadakı həmkarlarla geniş fikir və təcrübə mübadiləsi aparılacaqdır. Nəzərə alsaq ki, dünyada digər kütləvi informasiya vasitələrinə nisbətdə xəbər agentliklərinin sayı çox məhduddur və hər ölkədə cəmi bir neçə agentlik var, o zaman agentliklər arasında sıx əməkdaşlığa və təcrübə mübadiləsinə ehtiyac duyulur. EANA da məhz belə bir platformanı öz üzvlərinə təqdim edir.
-Cənab Vislozil, fikirlərinizi bizimlə bölüşdüyünüz üçün təşəkkür edirik və Sizi bir daha Azərbaycanda görməkdən şad olardıq!
######
Bölmənin digər xəbərləri
