Volodimir Zelenski ABŞ Prezidentinin xüsusi nümayəndəsi ilə görüşüb
Kiyev, 14 iyul, AZƏRTAC
Ukrayna Prezidenti Volodimir Zelenski iyulun 14-də ABŞ-ın təhlükəsizlik və müdafiə üzrə xüsusi nümayəndəsi Kit Kelloq ilə görüşüb.
AZƏRTAC bu barədə Ukrayna Prezidentinin ofisinə istinadla xəbər verir.
Dövlət başçısının sözlərinə görə, danışıqlar məhsuldar keçib, təhlükəsizliyin və sülhün gələcəyinin əsas məsələlərinə toxunulub.
Volodimir Zelenski deyib: “Biz sülhə gedən yolu və onu yaxınlaşdırmaq üçün praktiki olaraq birlikdə nə edə biləcəyimizi müzakirə etdik. Bu, Ukrayna üçün hava hücumundan müdafiəni gücləndirmək, birgə istehsal və Avropa ilə birlikdə müdafiə silahlarının alınması məsələləridir”.
Prezident vurğulayıb ki, Ukrayna Rusiyanın təcavüzünün qarşısının alınmasında ABŞ-ın aparıcı rol oynayacağını gözləyir. O qeyd edib ki, Moskvanın qeyri-adekvat ambisiyalarının qarşısı güc yolu ilə alınmasa, Kreml dayanmayacaq. Bundan əlavə, tərəflər Rusiya Federasiyası və onun müttəfiqlərinə qarşı sanksiyaların gücləndirilməsi məsələsinə də toxunublar.
Ukrayna Prezidenti Kit Kelloqa Kiyevə səfərinə görə təşəkkür edib, həmçinin dəstək siqnallarına və hər iki dövlət üçün müsbət qərarlara görə Donald Trampa minnətdarlığını bildirib. O vurğulayıb ki, Ukrayna Amerika xalqının dəstəyini yüksək qiymətləndirir.
Qeyd edək ki, Kelloq bu gün səhər saatlarında Ukraynaya gəlib. O, səfərini ötən həftə elan edib. Sonradan məlum olub ki, Kelloqa Rusiyanın hərbi potensialı və Ukraynanın perspektivləri ilə bağlı məlumatlar veriləcək. Prezident tərəfindən Ukrayna Silahlı Qüvvələrinin Ali Baş Komandanı Aleksandr Sırskiyə və Baş Qərargah rəisi Andrey Qnatova müvafiq tapşırıqlar verilib.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
