WUF13 Azərbaycanın beynəlxalq imicini gücləndirən strateji platforma kimi yadda qalacaq - ŞƏRH
Bakı, 21 may, AZƏRTAC
BMT-nin Ümumdünya Şəhərsalma Forumunun 13-cü Sessiyası (WUF13) Azərbaycanın beynəlxalq mövqeyi, şəhərsalma siyasəti və iqtisadi diplomatiyası baxımından mühüm nəticələr verməyə başlayıb. İlk növbədə, onu qeyd edim ki, Bakıda keçirilən Dünya Şəhərsalma Forumunda 182 ölkədən 45 mindən çox nümayəndənin qeydiyyatdan keçməsi özü-özlüyündə çox böyük uğur və rekord göstəricidir.
AZƏRTAC xəbər verir ki, bu fikirləri Milli Məclisin deputatı Azay Quliyev söyləyib.
Şəhərsalma və “ağıllı şəhər” modelinin tanıdılması, turizm və xidmət sektoruna iqtisadi töhfə
Azay Quliyev bildirib ki, WUF13-ün Azərbaycanda keçirilməsi ölkəmizə bir neçə istiqamətdə ciddi fayda qazandırır. Tədbirin Bakıda təşkili Azərbaycanın artıq yalnız enerji deyil, həm də dayanıqlı inkişaf, şəhərsalma və qlobal idarəetmə sahələrində etibarlı tərəfdaş kimi qəbul olunduğunu göstərir.
Forum çərçivəsində Bakıda və azad edilmiş ərazilərdə həyata keçirilən müasir şəhərsalma layihələri beynəlxalq auditoriyaya təqdim olunur. Xüsusilə Qarabağ və Şərqi Zəngəzurda qurulan “ağıllı şəhər” və “ağıllı kənd” konsepsiyaları ciddi beynəlxalq maraq doğurur. Bu, gələcəkdə ölkəmizə, xüsusilə Qarabağ və Şərqi Zəngəzura xarici investisiyaların cəlb edilməsinə, qabaqcıl texnologiyaların tətbiqinə və urbanistika sahəsində yeni əməkdaşlıq imkanlarına şərait yaradacaq.
WUF13 minlərlə xarici qonağı Bakıya gətirib. Otellər, nəqliyyat, restoranlar və xidmət sektoru üçün ciddi iqtisadi aktivlik yaranıb. Ölkəmizin gələcəkdə daha çox ölkədən turistlərin maraq dairəsinə düşməsi baxımından bu mötəbər tədbirin müstəsna əhəmiyyəti var.
WUF13-də əsas mövzulardan biri iqlim dəyişikliyi, davamlı şəhərlər və təhlükəsiz yaşayış məkanlarıdır. Forumun ölkəmizdə keçirilməsi Azərbaycanın COP29-dan sonra “yaşıl keçid” siyasətinin davamı kimi beynəlxalq ictimaiyyət tərəfindən yüksək qiymətləndirilir.
WUF13 çərçivəsində Azərbaycan QHT-ləri, universitetlər və dövlət qurumları beynəlxalq tərəfdaşlarla birbaşa əməkdaşlıq imkanları əldə etdilər. İlk dəfə olaraq WUF daxilində QHT Forumu və qrant proqramları təşkil olunub.
WUF13-də indiyə qədər əldə olunan əsas nəticələr
“WUF13-dən keçən günlər ərzində bir sıra mühüm nəticələri və təşəbbüsləri qeyd etmək olar. Belə ki, mənzil böhranı, iqlim dəyişikliyi və şəhər dayanıqlılığı üzrə qlobal siyasət müzakirələri aparılıb. Həmçinin Azərbaycanın postmünaqişə dövründə yenidənqurma təcrübəsi beynəlxalq platformada təqdim olunub. “Urban Expo” çərçivəsində Azərbaycan pavilyonunda ölkənin şəhərsalma nailiyyətləri nümayiş etdirilib, BMT, beynəlxalq maliyyə institutları və müxtəlif ölkələr arasında yeni əməkdaşlıq platformaları formalaşıb. Bundan əlavə, “Dünyanın yaşayışla təmin olunması: Təhlükəsiz və dayanıqlı şəhərlər və icmalar” mövzusu altında şəhərlərin gələcəyi ilə bağlı praktik yol xəritələri hazırlanmağa başlanıb.
Bir sözlə, WUF13 Azərbaycanın beynəlxalq imicini gücləndirən, iqtisadi və diplomatik imkanlarını genişləndirən, həmçinin ölkənin müasir şəhərsalma modelini dünyaya təqdim edən strateji platforma kimi yadda qalacaq”, - deyə A.Quliyev əlavə edib.
Bölmənin digər xəbərləri
