WUF13 Azərbaycanın beynəlxalq nüfuzunun daha da güclənməsinə mühüm töhfədir - ŞƏRH
Bakı, 18 may, AZƏRTAC
Azərbaycanın Ümumdünya Şəhərsalma Forumunun 13-cü Sessiyasına (WUF13) ev sahibliyi etməsi ölkəmizin artan beynəlxalq nüfuzunun, etibarlı tərəfdaş imicinin və qlobal təşəbbüslərdə fəal iştirakının növbəti mühüm göstəricisidir. Prezident İlham Əliyevin WUF13-ün Sessiyasının açılış mərasimində etdiyi çıxışdan da bəlli oldu ki, forum çərçivəsində Azərbaycan rekord sayda iştirakçı qəbul edir və bu göstərici forum davam etdikcə daha da artır. Bu, təkcə tədbirin miqyası ilə deyil, həm də Bakının beynəlxalq tədbirlərin keçirilməsi üçün təhlükəsiz, müasir və yüksək təşkilati imkanlara malik şəhər kimi formalaşması ilə bağlıdır. Son illərdə Bakı Avropa Oyunları, IV İslam Həmrəyliyi Oyunları, Qoşulmama Hərəkatının Zirvə Görüşü və COP29 kimi mühüm tədbirlərə uğurla ev sahibliyi edib.
Bu sözləri AZƏRTAC-a açıqlamasında Milli Məclisin deputatı Nurlan Həsənov söyləyib.
O bildirib ki, Forumda iştirak edən çoxsaylı xarici qonaqlar Azərbaycanın şəhərsalma sahəsində həyata keçirdiyi genişmiqyaslı layihələrlə yaxından tanış olmaq imkanı qazanırlar. Xüsusilə Bakıda həyata keçirilən müasir urbanizasiya layihələri, “Ağ Şəhər” konsepsiyası, nəqliyyat infrastrukturunun yenilənməsi, şəhərdaxili mobillik layihələri, yaşıllıq zonalarının artırılması və ekoloji mühitin yaxşılaşdırılması istiqamətində görülən işlər beynəlxalq maraq doğurur. Bununla yanaşı, işğaldan azad edilmiş ərazilərdə həyata keçirilən “ağıllı şəhər” və “ağıllı kənd” konsepsiyaları artıq region üçün innovativ inkişaf modeli kimi təqdim edilir. Zəngilanın Ağalı kəndində tətbiq olunan rəqəmsal idarəetmə sistemi, alternativ enerji mənbələrindən istifadə və müasir sosial infrastruktur beynəlxalq ekspertlər tərəfindən xüsusi maraqla izlənilir.
“Avropa ilə Asiyanın qovşağında yerləşən Azərbaycan zəngin tarixi-mədəni irsi ilə müasir memarlıq üslubunu uğurla birləşdirən ölkə kimi diqqət çəkir. UNESCO-nun Dünya İrs Siyahısına daxil edilmiş İçərişəhər kompleksi və Şəkinin tarixi mərkəzi Azərbaycanın qədim şəhərsalma ənənələrinin beynəlxalq səviyyədə tanındığını təsdiqləyir. Eyni zamanda, məşhur memar Zaha Hadidin layihəsi əsasında inşa edilən Heydər Əliyev Mərkəzi artıq dünya memarlığının ən tanınmış simvollarından birinə çevrilib. Bakı Bulvarının genişləndirilməsi, yeni parkların və ictimai məkanların yaradılması da şəhərsalmada insan amilinin əsas götürüldüyünü nümayiş etdirir”, – deyə N.Həsənov vurğulayıb.
Deputatın sözlərinə görə, Azərbaycan şəhərsalma siyasətində dayanıqlılıq, innovasiya və insan amilini əsas prioritetlərdən biri kimi qəbul edir. Qarabağ və Şərqi Zəngəzurda həyata keçirilən bərpa və yenidənqurma işləri bunun ən bariz nümunəsidir. Azad edilmiş ərazilərdə müasir infrastruktur qurulur, yeni yaşayış məntəqələri salınır, yaşıl enerji və ekoloji yanaşmalar tətbiq edilir. Füzuli, Zəngilan və Laçında beynəlxalq hava limanları istifadəyə verilib, yüzlərlə kilometr avtomobil və dəmir yolu çəkilib, yeni tunel və körpülər inşa olunub. Qarabağ və Şərqi Zəngəzur “yaşıl enerji zonası” elan edilib və bölgədə günəş, külək və su elektrik stansiyalarının yaradılması istiqamətində geniş layihələr həyata keçirilir. Bununla yanaşı, şəhərlərin Baş planları hazırlanarkən müasir urbanizasiya standartları, ekoloji tarazlıq və dayanıqlı inkişaf prinsipləri əsas götürülür. Bu model artıq beynəlxalq səviyyədə maraqla izlənilir və bir sıra beynəlxalq platformalarda nümunə kimi təqdim olunur.
“Bu baxımdan, Azərbaycan yalnız şəhərsalma və memarlıq sahəsində deyil, humanitar, siyasi və iqtisadi sahələrdə də qabaqcıl və təşəbbüskar dövlət kimi çıxış edir. Ölkəmiz enerji təhlükəsizliyi, multikulturalizm, humanitar əməkdaşlıq və iqlim gündəliyi ilə bağlı qlobal təşəbbüslərdə fəal rol oynayır. WUF13 forumu isə Azərbaycanın beynəlxalq nüfuzunun daha da güclənməsinə, ölkəmizin müasir inkişaf modelinin dünyaya təqdim olunmasına və şəhərsalma sahəsində əldə etdiyi nailiyyətlərin beynəlxalq ictimaiyyətə çatdırılmasına mühüm töhfə verir”,- deyə N.Həsənov əlavə edib.
Bölmənin digər xəbərləri
