WUF13 Azərbaycanın dünya səviyyəli tədbirlərə ev sahibliyi gücünün simvoluna çevrilib - ŞƏRH
Bakı, 20 may, AZƏRTAC
BMT-nin Məskunlaşma Proqramı (UN-Habitat) və Azərbaycan hökuməti tərəfindən birgə təşkil olunan Ümumdünya Şəhərsalma Forumunun 13-cü Sessiyası (WUF13) urbanizasiya və şəhərlərin gələcəyinə həsr olunmuş dünyanın ən nüfuzlu beynəlxalq konfranslarından biri sayılır.
Bu sözləri AZƏRTAC-a açıqlamasında politoloq Tural İsmayılov söyləyib.
"Forum dünya miqyasında kəskin şəkil almış mənzil böhranını ön plana çəkir - hazırda dünyada təqribən 3 milyard insan qeyri-kafi yaşayış şəraitinə malikdir. 2050-ci ilə qədər dünya əhalisinin 70 faizinin şəhərlərdə yaşayacağı proqnozlaşdırılır ki, bu da sürətli urbanizasiyanın, eyni zamanda, böyük imkanlar, həm də mürəkkəb problemlər yaratdığını göstərir. Açılış günü keçirilən Yeni Şəhər Gündəliyi üzrə Nazirlər Görüşü Azərbaycanın sədrliyi ilə WUF13 proqramının yeni bir təşəbbüsü kimi həyata keçirildi. 100-dən çox ölkənin nümayəndələri gündəliyin icrasında əldə edilən nailiyyətləri nəzərdən keçirib, mövcud problemləri müzakirə edib və növbəti mərhələnin prioritetlərini müəyyənləşdirib.
WUF13-ün Bakıda keçirilməsi Azərbaycanın beynəlxalq urbanizasiya proseslərinə verdiyi töhfənin rəsmi tanınması kimi dəyərləndirilir. UN-Habitat ilə birgə "Bakı Şəhər Mükafatı" adlı yeni beynəlxalq təşəbbüsün tətbiqi planlaşdırılır ki, bu mükafat dayanıqlı şəhər inkişafı, xüsusilə mənzil sahəsindəki fərqli uğurları təltif edəcək. Bundan əlavə, WUF13 üçün hazırlanan "Bakı standartları" əsasında gələcək forumları keçirəcək ölkələr üçün ətraflı əməliyyat bələdçisinin hazırlanması nəzərdə tutulur. Azərbaycan dövləti tərəfindən Qarabağ və Şərqi Zəngəzurda həyata keçirilən yenidənqurma və şəhərsalma modeli, "Ağıllı şəhər" və "Ağıllı kənd" konsepsiyaları, həmçinin bu regionların yaşıl enerji zonasına çevrilməsi istiqamətindəki işlər müasir urbanizasiya və ekoloji bərpanın qabaqcıl nümunəsi kimi dünya ictimaiyyətinə təqdim edilir. 2026-cı ilin "Şəhərsalma və Memarlıq İli" elan edilməsi isə bu istiqamətin dövlət siyasətinin əsas prioritetlərindən biri olduğunu bir daha təsdiqləyir",- deyə T. İsmayılov vurğulayıb.
Politoloq əlavə edib ki, WUF13 Bakı üçün, sadəcə, bir beynəlxalq hadisənin ünvanı olmaqdan çox-çox artıqdır.
Bu platforma Azərbaycanın xarabalıqdan müasir şəhərlər qurmaq, yaşıl urbanizasiya prinsiplərini tətbiq etmək və dünya səviyyəli tədbirlərə ev sahibliyi etmək gücünü bütün dünyaya nümayiş etdirən simvola çevrilib.
Bölmənin digər xəbərləri
