Heydər Əliyev canı qədər sevdiyi Azərbaycandan, xalqımızdan yalnız cismən ayrılıbdır. Bu böyük şəxsiyyətin xatirəsi Azərbaycan xalqının qəlbində əbədi məskən salmışdır. Onun ideyaları əbədiyyətə qədər Azərbaycana yol göstərəcəkdir.

Azərbaycan tarixinin Heydər Əliyev dövrü vətənini və millətini təhlükələrdən qurtararaq ardıcıl inkişaf yoluna çıxaran nəhəng şəxsiyyətin zamanın fövqünə yüksəlməsinə parlaq bir nümunədir. Heydər Əliyev xalqımızın dövlətçilik ənənələrini davam etdirərək daha da zənginləşdirmiş, uzaqgörənliyi və müdrikliyi, cəsarəti və fədakarlığı sayəsində müstəqil Azərbaycan dövlətini qoruyub saxlamışdır. İftixarla deyə bilərik ki, müstəqil Azərbaycan dövləti onun dühasının şah əsəri, indiki və gələcək nəsillərə əmanətidir.

Bu fikri həmin gün Fəxri xiyabanda AZƏRTAC-ın müxbirləri ilə söhbət edən müsahiblər dəfələrlə səsləndirmişlər.

Onlardan biri də Nəsimi rayonunun sakini, 83 yaşlı GÜLMURAD QURBANOVDUR: “Mən dünyanın hər üzünü görmüşəm. Tarixi şəxsiyyətlər barədə də çox eşitmişəm. Amma Heydər Əliyevin tayı-bərabəri yoxdur.

Rəhmətlik həm müdrik siyasətçi idi, həm də qayğıkeş insan. XX əsr boyu Azərbaycanda insanlara, o cümlədən mütəxəssislərə, ziyalılara Heydər Əliyev kimi daim qayğı göstərən, onları yüksək dəyərləndirən, kadrlarla işi hər zaman diqqət mərkəzində saxlayan ikinci bir dövlət başçısı olmayıbdır. Ölkənin gələcək inkişafını təmin edə biləcək kadrlar hazırlanması onun idarəçiliyinin əsas xüsusiyyətlərindən biri idi. Xalqımızın haqqı tapdalanmış görkəmli övladlarının, şəxsiyyətlərinin adlarının özlərinə qaytarılması, xatirələrinin əbədiləşdirilməsi, o cümlədən heykəllərinin qoyulması da Heydər Əliyevin adı ilə bağlıdır. Ona olan ümumxalq sevgisinin bir səbəbi də budur. Görün, nə qədər adam gəlir?! Onların hamısını buraya ürəklərinin hökmü, əbədi Prezidentimizə məhəbbət gətirir. O, bu sevgiyə, bu məhəbbətə layiqdir. Axı, ölkəni aclıqdan, səfalətdən, parçalanmaqdan, təhqirdən və müharibədən məhz millətin bu böyük oğlu xilas etmişdir. Heydər Əliyev olmasaydı, bax o tərəfdə gördüyünüz Şəhidlər xiyabanı ondan da böyük olardı. Mənim yaşım çoxdur, səksəni keçmişəm. 1990-cı illərin əvvəllərini yadınıza salın. Necə ağır günlər idi. Allah ona rəhmət eləsin, Heydər Əliyev olmasaydı, bugünkü azadlıq, bolluq və firavanlıq da olmazdı. Gör, o, nə qədər uzaqgörən adam idi ki, özündən sonranı da fikirləşib İlham Əliyev kimi şəxsiyyət qoyub getdi. Gərək biz o cür insana qızıldan heykəl qoyaydıq.

Allah ona rəhmət eləsin, məzarı nurla dolsun!”

…Azərbaycanlı olduğu üçün həmişə fəxr edən, bu hissini dünyaya car çəkən nadir şəxsiyyətin həyat və fəaliyyəti Azərbaycan tarixinin ən parlaq səhifəsinə çevrilibdir.

Şuşa Mədəni-Maarif Məktəbinin direktoru RƏSUL İSMAYILOV ümummilli liderin fəaliyyətinin məhz bu cəhətini vurğulayır: “Heydər Əliyev millətini hədsiz məhəbbətlə sevən, dünyanın harasında yaşamasından asılı olmayaraq, onları bir, həmrəy görmək istəyən Böyük Azərbaycanlı idi. Bütün ölkələrə səfərləri zamanı işinin gərgin olmasına baxmayaraq, həmin ölkədə yaşayan həmvətənlərimizlə görüşüb onların problemləri ilə maraqlanır, Azərbaycan ətrafında sıx birləşməyə çağırırdı. Milli diasporun formalaşması, inkişafı da bu böyük insanın adı ilə bağlıdır. O, dünya azərbaycanlılarının birliyinə, həmrəyliyinə nail olmaq üçün vahid milli ideologiya, azərbaycançılıq ideologiyasını işləyib hazırladı. 2001-ci ildə Bakı şəhərində dünya azərbaycanlılarının birinci qurultayı keçirilməklə həmin ideologiya həyata vəsiqə aldı. Təsadüfi deyildir ki, dünyanın hansı ölkəsində yaşamasından asılı olmayaraq, hər bir vətənpərvər azərbaycanlı bu dahi şəxsiyyəti özünün əzəli və əbədi Prezidenti sayır. Allah rəhmət eləsin!”

... Bu gün respublikamızın hər yerində dahi şəxsiyyətin anma mərasimləri keçirilir. Bu mərasimlər müxtəlif tədbirlərlə davam edir. Həmin tədbirlərdə dahi siyasi xadimin təkcə ölkənin iqtisadi inkişafın sürətləndirilməsi üçün deyil, Azərbaycanın dünya birliyində layiqli yerini tutması üçün də apardığı uğurlu xarici siyasətdən söz açılır. Azərbaycan Respublikasının Avropa Şurasına qəbulu, NATO və Avropa Birliyi ilə genişlənən əməkdaşlıq bu siyasətin bəhrəsi kimi xarakterizə edilir.

... 12 dekabr. İzdiham hüznlü musiqinin sədaları altında türk dünyasının böyük oğlunun məzarını ziyarət edir.

İş adamı RÖVŞƏN QULİYEV böyük şəxsiyyət haqqında danışarkən çox incə bir məqama toxunur: “Azərbaycan həmişə Şərqin ulduzu olub. Bu imicin qaytarılması üçün Heydər Əliyev nə lazımdırsa etdi. Onun təşəbbüsü ilə Şərqdə ilk dəfə olaraq, Azərbaycanda ölüm hökmü ləğv edildi. Bu addım dünyaya sübut etdi ki, Azərbaycan adlı məmləkətdə böyük mənəvi və mədəni keyfiyyətlərə malik insanlar yaşayırlar. Bu addım uzun illər erməni təbliğat maşınının azərbaycanlılar haqqında yaratmaq istədiyi mənfi imicə öldürücü zərbə vurdu.

Mən əslən qarabağlıyam, Füzuli rayonundanam. Ona görə də xalqımızın bu böyük oğlunun Ermənistan-Azərbaycan, Dağlıq Qarabağ münaqişəsinin həllinə yönəlmiş fəaliyyətini böyük diqqətlə izləyirdim. O, bu münaqişənin mahiyyətini beynəlxalq ictimaiyyətə olduğu kimi çatdırmaqdan ötrü hansı əziyyətlərə qatlaşmadı?! Nə qədər maneələr dəf etdi! Nəhayət, problemin beynəlxalq hüquq normaları və prinsipləri əsasında sülh yolu ilə aradan qaldırılmasının ideya müəllifinə çevrildi.

Ən ağrılı problemimiz olan Dağlıq Qarabağ münaqişəsi bir milyondan çox soydaşımızı evsiz-eşiksiz qoymuş, Azərbaycan iqtisadiyyatına olduqca ağır zərbə vurmuşdur. Lakin bütün bu məhrumiyyətlərə baxmayaraq, ümummilli liderimiz Heydər Əliyevin rəhbərliyi ilə hazırlanmış və gerçəkləşdirilmiş iqtisadi islahatlar və yeni neft strategiyası artıq konkret nəticələrini verməyə başlamışdır. Bu islahatlar ölkədə makroiqtisadi sabitliyə və iqtisadi yüksəlişə, o cümlədən sahibkarlığın inkişafına şərait yaratmışdır”.

...Heydər Əliyevin anma tədbirlərində qeyd olunur ki, müasir Azərbaycan bu gün dünya ölkələrinin ən qabaqcıl təcrübəsindən və dəyərlərindən bəhrələnərək, demokratik, hüquqi, dünyəvi dövlət, vətəndaş cəmiyyəti, insan hüquqlarının aliliyi, siyasi plüralizm prinsiplərini rəhbər tutaraq inkişaf edir.

Azərbaycan regionda lider dövlətə çevrilmişdir. İndi onun iştirakı, razılığı olmadan heç bir regional layihə həyata keçirilə bilməz. Azərbaycanı tanıyırlar, qəbul edirlər və onunla hesablaşırlar. Qürur hissi ilə vurğulanır ki, Azərbaycanın dünyadakı yeri Heydər Əliyevin yeri, sözü, onun sözü, Azərbaycanın dünyadakı mövqeyi Heydər Əliyevin mövqeyidir...

ŞAİTDİN ƏLİYEV (Milli Məclisin sabiq deputatı): “Görkəmli şəxsiyyətlərin, dahi insanların tarixdəki rolu o zaman dəyərli olur ki, onlar şəraiti, hadisələrin gedişini və gələcəyi başqalarından daha dəqiq və düzgün qiymətləndirə bilsinlər. XX əsrin fenomenal şəxsiyyəti, Azərbaycan xalqının böyük oğlu Heydər Əliyev belə xadimlərdən idi. Onda atalıq, alicənablıq, mətinlik, səbirlilik, sadiqlik kimi dövlət rəhbərinə xas olan bütün xüsusiyyətlər cəmləşmişdi. Dünya miqyaslı siyasətçinin respublikada yaratdığı ictimai-siyasi sabitlik, ölkə həyatının bütün sahələrində apardığı islahatlar müstəqil Azərbaycanın hüquqi, demokratik və dünyəvi dövlət kimi beynəlxalq münasibətlər sistemində özünü təsdiq etməsinə gətirib çıxarmışdır. Məhz buna görə də qədirbilən xalqımız öz dahi oğlunun xatirəsini həmişə əziz tutacaq, onu unutmayacaq, əksinə, ulu öndərə olan sevgisi daha da artacaqdır.

Allah ulu öndərimizə qəni-qəni rəhmət eləsin!”

...Dünya şöhrətli siyasətçi və dövlət xadimi Heydər Əliyevin haqq dünyasına qovuşmasından keçən dövr, eyni zamanda, bütün mənalı həyatını millətinin xoşbəxtliyinə həsr etmiş dahi şəxsiyyətin zəngin irsinə, müəyyənləşdirdiyi siyasi xəttinə və prinsiplərə bizim nə dərəcədə sadiq olduğumuzu sınaqdan çıxardı. Milli Məclisin deputatı ELMAN MƏMMƏDOV müxbirimizlə söhbətdə dedi: “Siyasətdə və dövlətçiliyin təcrübəsində də varisliyin olması gələcək inkişafı şərtləndirən başlıca amillərdən biridir. Fərəhli haldır ki, bu gün ümummilli liderimizin yolunu onun siyasi məktəbinin yetirməsi, Azərbaycan Respublikasının Prezidenti cənab İlham Əliyev layiqincə davam etdirir. 2003-cü il oktyabrın 15-də tarixi seçim edən Azərbaycan xalqı sabitliyə, tərəqqiyə və sivilizasiyalı dünyaya inteqrasiyanın güclənməsinə tərəfdar olduğunu, demokratik prinsiplərə sadiqliyini bir daha təsdiqlədi. Bu seçimlə ölkəmizi böyük tərəqqiyə aparan yolun - Heydər Əliyev yolunun davam etdirilməsinin əsası qoyuldu. Bu gün İlham Əliyev müstəqil Azərbaycan dövlətini onun memarı və qurucusu olan Heydər Əliyevin müəyyən etdiyi yolla inamla gələcəyə doğru aparır. Əminik ki, onun rəhbərliyi ilə ölkəmizin daha işıqlı və firavan həyata qovuşacağı günlər uzaqda deyildir. Bunun üçün biz hamımız cənab İlham Əliyevin ətrafında birləşməli, Heydər Əliyevin ideyalarını davam etdirmək naminə əlimizdən gələni əsirgəməməliyik. Çünki bizim bu günümüz və sabahımız ulu öndərin ölməz ideyaları ilə sıx bağlıdır. Bu ideyaların layiqli varisi olmaq, onların tam şəkildə həyata keçməsinə kömək etmək hər birimizin mənəvi borcudur. Allah rəhmət eləsin!”