İQTİSADİYYAT
XARİCİ MÜTƏXƏSSİSLƏR BAKI FOND BİRJASINA YARDIM EDƏCƏKLƏR
Yaxin vaxtlarda Beynəlxalq Maliyyə Korporasiyası (BMK) Bakı Fond Birjasına və Qiymətli Kağızlar üzrə Dövlət Komitəsinə (QKDK) texniki yardım göstərilməsi layihəsini həyata keçirməyə başlayacaqdır.
Komitədən AZƏRTAC-a bildirmişlər ki, bu layihə üç mərhələdə həyata keçiriləcək və 2003-cü ilin may ayınadək nəzərdə tutulmuşdur. Birinci mərhələdə - 2003-cü ilin fevral ayında QKDK-nın hazırladığı normativ baza təhlil olunacaq, fond bazarının peşəkar iştirakçıları üçün seminarlar keçiriləcəkdir.
Mart ayında keçiriləcək növbəti mərhələdə xarici mütəxəssislərin rəhbərliyi ilə ayrı-ayrı sərmayədarlar üçün seminarlar təşkil olunacaqdır. Layihənin yekun mərhələsində isə Bakı Fond Birjasının və Qiymətli Kağızlar üzrə Dövlət Komitəsinin mütəxəssislər və ekspertlər Amsterdam Fond Birjasında təcrübə keçəcəkdir.
Layihəni Hollandiyanın məşhur “ATOS Konsaltinq” şirkəti reallaşdıracaqdır.
Xarici ekspertlərin azərbaycanlı həmkarlarına köməyinin milli qiymətli kağızlar bazarının bərqərar olması üçün böyük əhəmiyyəti var. Layihənin həyata keçirilməsi Azərbaycan mütəxəssislərinin ixtisaslarını artırmağa da imkan yaradacaq və ölkəmizdə korporativ fond bazarının inkişafına təkan verəcəkdir.