Xəzər dənizindəki neft-qaz yataqlarında mövsümi ekoloji monitorinq işləri aparılır
Bakı, 2 may (AZƏRTAC). Azərbaycan Respublikası Dövlət Neft Şirkətinin (ARDNŞ) ekologiya idarəsinin ekoloji monitorinq departamenti Xəzər dənizinin Azərbaycan sektorundakı neft-qaz yataqlarında il ərzində iki dəfə olmaqla, yaz-yay, payız-qış mövsümlərində ekoloji monitorinqlər aparır.
ARDNŞ-in mətbuat xidmətindən AZƏRTAC-a bildirmişlər ki, cari ilin aprel ayında departamentin ekoloji tədqiqatlar ekspedisiyası tərəfindən “MPK-452” gəmisi vasitəsilə N.Nərimanov adına neft və qaz çıxarma idarəsinin istismar etdiyi “8 Mart” və “Səngəcal-Duvvanı-Xərə-Zirə” yataqlarında ətraf mühitin vəziyyətinin monitorinqi həyata keçirilmişdir. Monitorinqlər zamanı layihə üzrə seçilmiş stansiyalarda su nümunələri götürülmüş, həmin nümunələrdə hidrogen ionlarının qatılığı (pH), oksigenin miqdarı, suyun duzluluğu, elektrik keçiriciliyi və temperaturu gəminin laboratoriyasındakı “Professional Plus” çoxrejimli analitik cihazla təyin olunmuşdur.
Bundan əlavə, yataqlarda mövsümlər üzrə dinamikanın öyrənilməsi məqsədilə dəniz dibindən çöküntü və bentos nümunələri, dəniz suyundan fitoplankton və zooplankton nümunələri götürülmüş, gəminin laboratoriyasında konservasiya edilmiş, qablaşdırılmış və ekologiya idarəsinin sahildə yerləşən kompleks tədqiqatlar laboratoriyasına təhvil verilmişdir. Monitorinq zamanı stansiyalarda dəniz axınlarının sürət və istiqaməti müasir tipli “3D-ACM-7000” cihazı vasitəsilə ölçülmüşdür.
Aparılacaq analitik tədqiqatlardan sonra ətraf mühitin vəziyyəti barədə monitorinq hesabatı hazırlanacaqdır. Ekoloji monitorinq işlərinin digər dəniz yataqlarında da davam etdirilməsi nəzərdə tutulur.
Bölmənin digər xəbərləri
