XOCALI FACİƏSİNİN 16-CI İLDÖNÜMÜ MOSKVADA QEYD EDİLMİŞDİR
AZƏRTAC-ın xüsusi müxbiri xəbər verir ki, Azərbaycanın Rusiyadakı səfirliyində Xocalı faciəsinin 16-cı ildönümü münasibətilə “Bəşəriyyət əleyhinə cinayətlər müasir beynəlxalq hüquq kontekstində: Xocalı faciəsi” mövzusunda “dəyirmi masa” iclası keçirilmişdir.
Azərbaycanın RF-dəki səfiri Polad Bülbüloğlu tədbiri açaraq 1992-ci il fevralın 26-na keçən gecə baş vermiş faciəli hadisələr haqqında danışmışdır. Diplomat demişdir: “Bu gün Xocalı soyqırımının 16-cı ildönümü ilə əlaqədar dünyanın 30 ölkəsində Heydər Əliyev Fondunun dəstəyi və iştirakı ilə tədbirlər keçirilir. Sabah Heydər Əliyev Fondunun Rusiyadakı nümayəndəliyinin rəhbəri Leyla Əliyeva başda olmaqla Moskvada da azərbaycanlı gənclərin kütləvi tədbiri keçiriləcəkdir”.
Daha sonra o qeyd etmişdir ki, Azərbaycan Prezidenti İlham Əliyev bu faciə haqqında bütün həqiqətin dünya ictimaiyyətinə çatdırılması üçün səy göstərir. Azərbaycanın və onun xalqının müstəqilliyi çox baha başa gəlmişdir. İndi yeni nəsil böyüməkdədir, buna görə də gələcəkdə belə faciələrin təkrarlanmaması üçün Xocalı hadisələrinə dəqiq hüquqi və mənəvi qiymət verilməlidir. Səfir Xocalıda baş vermiş faciəli hadisələrə aid statistik rəqəmləri səsləndirərək, bu qanlı qırğında keçmiş SSRİ-nin 366-cı motoatıcı alayının iştirakını, həmin alayın heyətində ermənilərin çox olmasını vurğulamış və qeyd etmişdir ki, Azərbaycanın siyasi rəhbərliyi və Azərbaycan cəmiyyəti keçmiş SSRİ-ni heç vaxt Rusiya ilə eyniləşdirməmişdir və indi də eyniləşdirmir. Ona görə də bugünkü “dəyirmi masa” faciə qurbanlarının xatirəsini yad etmək və bu qanlı olaylarla bağlı mövqeyimizi bir daha bəyan etmək məqsədi güdür. Həmin mövqe isə faciənin təqsirkarlarının cəzalandırılmasına nail olmaqdan ibarətdir ki, bu hadisə bütün dünyada geniş rezonansa səbəb olsun.
Azərbaycan Xarici İşlər Nazirliyinin Xarici Siyasətin planlaşdırılması və strateji tədqiqatlar idarəsinin rəisi Tofiq Musayev qeyd etmişdir ki, müasir beynəlxalq hüquq, beynəlxalq təşkilatların bu məsələlərə dair qəbul etdiyi qətnamələr və konvensiyalar xüsusilə ağır beynəlxalq cinayətlərin törədilməsinə görə həm fiziki şəxsləri, həm də bütövlükdə dövlətləri layiqincə cəzalandırmağa imkan verir. O daha sonra qeyd etmişdir ki, aparılmış əməliyyat-istintaq tədbirləri nəticəsində Azərbaycanın Baş Prokurorluğu yüzlərlə cinayət işi qaldırmış, 31 nəfərin həbs olunması üçün order verilmiş və onların barəsində İnterpol vasitəsilə beynəlxalq axtarış elan edilmişdir. T.Musayev demişdir: “Beynəlxalq praktikada maskalanma və ya beynəlxalq cinayətlərdə özünün iştirakını inkar etmə halları məlumdur. Bu, Azərbaycan ərazilərinin bir hissəsinin işğal edilməsi faktının özünü də, soyqırımı və etnik təmizləmələrdə iştirakını da inkar edən Ermənistana xas olan yanaşmadır. Lakin Azərbaycanda Ermənistanın, eləcə də bu ölkənin ali hərbi rəhbərliyində təmsil olunan konkret şəxslərin Azərbaycana qarşı təcavüzdə, Azərbaycan torpaqlarının işğalında və münaqişənin gedişində insanlığa qarşı ağır cinayətlər törədilməsində iştirakını təsdiq edən kifayət qədər fakt və sənəd toplanmışdır”. Daha sonra o, Ermənistanın prezidenti vəzifəsinə seçilmiş Serj Sarkisyanın britaniyalı jurnalist Tomas de Vaalın “Qara bağ Ermənistan və Azərbaycan müharibə ilə sülh arasında” kitabında verilmiş aşağıdakı sözlərini sitat gətirmişdir: “Xocalı hadisələrinə qədər azərbaycanlılar elə fikirləşirdilər ki, bizimlə zarafat etmək olar. Onlar güman edirdilər ki, ermənilər mülki əhaliyə əl qaldıra bilməzlər. Biz bu stereotipi sındırmağa nail olduq”.
Rusiya Elmlər Akademiyasının Dövlət və Hüquq İnstitutunun kiçik elmi işçisi İrina Lyalina, İTAR-TASS agentliyinin baş direktorunun birinci müavini Mixail Qusman, MDU-nun Postsovet məkanı üzrə İnformasiya-analitik mərkəzinin eksperti Aleksandr Karavayev, MDU-nun “Beynəlxalq hüquq” ixtisası üzrə aspirantı Emin Dəmirçiyev, Rusiya Elmlər Akademiyasının Avropa İnstitutunun Aralıq Dənizi və Qara Dəniz Hövzəsi Problemlərinin öyrənilməsi üzrə mərkəzinin rəhbəri Alla Yazıkova və başqaları bu məsələnin hüquq müstəvisində həll edilməsinin, Xocalıda azərbaycanlılara qarşı soyqırımı haqqında və bütövlükdə Qarabağ münaqişəsi haqqında bütün həqiqətin dünya ictimaiyyətinə çatdırılmasının zəruri olmasından danışdılar.
Tədbirdə Heydər Əliyev Fondunun RF-dəki nümayəndəliyinin başçısı Leyla Əliyeva, Rusiyanın ictimai-siyasi və elmi dairələrinin, ictimai təşkilatların və azərbaycanlı gənclərin nümayəndələri iştirak etmişdir.
İclas iştirakçılarına “Xocalı soyqırımı sənədlərdə, faktlarda və xarici mətbuatda” kitabı, eləcə də beynəlxalq “İrs-Naslediye” jurnalının Ermənistan-Azərbaycan, Dağlıq Qarabağ münaqişəsinə həsr edilmiş xüsusi nömrələri paylanmışdır.
Bölmənin digər xəbərləri
