Xocalı faciəsinin ildönümünə həsr olunmuş anım tədbiri keçirilmişdir
Bakı, 21 fevral (AZƏRTAC). Fevralın 21-də Xəzər Universitetində “Azərbaycan-Latın Amerika Gənclərinin Dostluğu” İctimai Birliyinin təşkilatçılığı ilə Xocalı faciəsinin 21-ci ildönümünə həsr olunmuş anım tədbiri keçirilmişdir.
AZƏRTAC xəbər verir ki, əvvəlcə Xocalı faciəsində həlak olanların əziz xatirəsi bir dəqiqəlik sükutla yad edilmişdir.
Tədbirdə Xəzər Universitetinin qərb dilləri departamentinin əlaqələndiricisi Günel Məmmədova Xocalı faciəsinin acı nəticələrindən danışmışdır. Bildirmişdir ki, 1992-ci ildə fevralın 25-dən 26-na keçən gecə erməni qəsbkarları Xocalıda dinc sakinlərə hücum edərək, şəhəri artilleriya atəşinə tutmuşlar. Etnik zəmində törədilən vəhşiliklər nəticəsində Xocalı əhalisindən 613 nəfəri öldürülmüş, mindən artıq dinc sakin müxtəlif dərəcəli güllə yarası almış, 1.275 nəfər girov götürülmüş, 150 nəfəri isə itkin düşmüşdür.
Birliyin sədri Mahir Qurbanov hər il rəhbərlik etdiyi qurumun müxtəlif layihələr həyata keçirdiyini diqqətə çatdırmışdır. Bununla yanaşı, Xocalı faciəsi ilə əlaqədar ali məktəb və elm ocaqlarında tədbirlər təşkil edilir. Birliyin əsas məqsədi Xocalı həqiqətlərini Latın Amerikası icmasına ispan dilində çatdırılmasıdır. Yeni yaradılmış birlik Latın Amerikasının 20-dən çox gənclər təşkilatı ilə əməkdaşlıq edir, Xocalı faciəsinin həqiqətlərini həmin təşkilatlara ispan dilində çatdırılması üçün işlər görür.
Universitetin ictimai əlaqələr və media üzrə direktoru Əlövsət Əmirbəyli və digər çıxış edənlər ermənilərin Xocalı şəhərində törətdikləri qırğının acı nəticələrindən, dinc əhaliyə amansız divan tutulmasından danışmış, Xocalı soyqırımını XX əsrin ən böyük faciəsi adlandırmışlar.
Tədbirdə Azərbaycanın Meksikadakı səfirliyinin hazırladığı Xocalı qətliamını əks etdirən sənədli film (ispan dilində) nümayiş etdirilmişdir.
Bölmənin digər xəbərləri
