Xocalı soyqırımı ilə bağlı Malayziyada və Moldovada keçirilmiş tədbirlərdə bu ölkələrin ictimaiyyəti məlumatlandırılmışdır
Bakı, 27 fevral (AZƏRTAC). Fevralın 25-26-da Malayziyanın paytaxtı Kuala-Lumpurda 40-dan çox ölkədən olan sülh fəallarının iştirakı ilə keçirilən “Mahathir Qlobal Sülh Məktəbi” Beynəlxalq Forumunda Xocalı soyqırımı anılmışdır.
Beynəlxalq Forumda ölkəmizi təmsil edən azərbaycanlı tələbə, İndoneziya Beynəlxalq Tələbələr Assosiasiyasının vitse-prezidenti Elmar İsgəndərov dünyada baş verən digər etnik münaqişələrlə müqayisədə Ermənistan-Azərbaycan, Dağlıq Qarabağ problemi haqqında beynəlxalq ictimaiyyətin az məlumatlı olduğunu vurğulamışdır. Onun təşəbbüsü ilə Dağlıq Qarabağ münaqişəsi və Xocalı soyqırımı forumun sessiyalarının müzakirə mövzuları sırasına daxil edilmişdir.
Dialoq və Əməkdaşlıq uğrunda İslam Konfransı Gənclər Forumundan (DƏ-İKGF) AZƏRTAC-a bildirmişlər ki, forumda Dağlıq Qarabağ münaqişəsi və erməni hərbi birləşmələri tərəfindən Xocalı şəhərində azərbaycanlı mülki əhaliyə qarşı törədilmiş vəhşiliklər haqqında geniş məlumat verilmişdir. Həmçinin iştirakçıların “Xocalıya ədalət” beynəlxalq təbliğat və məlumatlandırma kampaniyasına dəstək olmalarına çağırış edilmişdir.
Forum iştirakçıları Xocalı soyqırımını törədən Ermənistanın cinayətkar əməllərini qınamış, işğala son qoyulmasını tələb etmişlər.
Beynəlxalq forum ənənəvi olaraq sülh və münaqişələrin həll edilməsi üzrə xarici və yerli ekspertlər, sülh üzrə Nobel mükafatçıları, Malayziyanın və İndoneziyanın dövlət rəsmiləri, xarici ölkələrdən olan 40 sülh fəalının, o cümlədən malayziyalı və indoneziyalı tələbələrin iştirakı ilə təşkil olunur. Forum fevralın 17-dən martın 1-dək Malayziyanın Perdana Qlobal Sülh Fondu və İndoneziyanın Coqcakarta Muhammadiyah Universitetinin təşkilatçılığı ilə Malayziya Xarici İşlər Nazirliyinin nəzdindəki Diplomatiya və Xarici Əlaqələr İnstitutunda keçirilir. Beynəlxalq forumun missiyası dövlətlərarası münasibətlər və diplomatiya, münaqişələrin həll olunması və qlobal sülhə nail olmaqdır.
Moldovanın paytaxtı Kişineunun mərkəzi Ştefan çel Mare parkında da Moldova Azərbaycanlıları Konqresinin gənclər təşkilatı tərəfindən Xocalı faciəsinin 22-ci ildönümünə həsr olunmuş “Xocalıya ədalət” aksiyası keçirilmişdir.
Xocalı soyqırımını Moldova ictimaiyyətinə çatdırmaq məqsədilə təşkil olunmuş aksiyada qətliamın dəhşətlərini əks etdirən fotostendlər, kitablar, məlumat vərəqələri və bu ölkənin “Ekspert” qəzetində faciə ilə bağlı dərc olunan məqalə təqdim edilmiş, matəm musiqisi səsləndirilmişdir.
Tədbirdə diasporumuzun rəhbərliyi, azərbaycanlı və yerli tələbələr, gənclər təşkilatlarının təmsilçiləri, o cümlədən KİV-lərin nümayəndələri iştirak etmişlər.
Bölmənin digər xəbərləri
