XOCALI SOYQIRIMI TÜRKİYƏ PARLAMENTİNDƏ MÜZAKİRƏ OLUNMUŞDUR
AZƏRTAC-ın xüsusi müxbiri xəbər verir ki, Türkiyə Böyük Millət Məclisinin (TBMM) fevralın 26-da keçirilmiş geniş iclasında 1992-ci ildə Azərbaycanın Xocalı şəhərində ermənilərin dinc əhaliyə qarşı törətdiyi qətliam müzakirə olunmuşdur.
TBMM-in vitse-spikeri Gürdal Mumçunun sədrlik etdiyi iclasda çıxış edən Ərdahandan millət vəkili Ənsar Öyüt Xocalı faciəsinin ildönümlərinin Azərbaycanda və bütün türk dünyasında geniş qeyd olunduğunu, bu dəhşətli faciəni törədənlərin öz cəzalarını alacaqlarını bildirmişdir.
Türkiyə-Azərbaycan parlamentlərarası dostluq qrupunun sədri, Konyadan millət vəkili Mustafa Kabakçı çıxışına erməni jurnalistinin “Xaç naminə” kitabından sitatla başladı. Kitabda bildirilir ki, “Kaplan” adlanan və cəsədlərin yandırılması ilə məşğul olan erməni qrupu martın 2-də 100 azərbaycanlının meyitini Xocalının 1 kilometr qərbində bir yerə gətirdi. Sonuncu yük maşınında 10 yaşlı bir qız uşağı gördüm. Başından və əlindən yaralı idi, üzü göyərmişdi. Soyuğa, aclığa və yaralarına rəğmən hələ sağ idi. Gözlərini ölüm qorxusu sarmışdı. Elə bu zaman, Tiqranyan familiyalı bir əsgər onu cəsəd qalağının üzərinə atdı. Sonra bütün cəsədləri yandırdılar. Sanki, yanan cəsədlər arasından bir fəryad eşitdim. Əlimdən bir şey gəlmirdi və mən Şuşaya qayıtdım. Onlarsa, xaç naminə müharibəyə davam etdilər”.
Bu qorxunc vəhşətin hətta erməni jurnalistində də vicdan əzabı doğurduğunu qeyd edən Mustafa Kabakçı, faciənin qurbanlarına Allahdan rəhmət dilədi və 16 il keçməsinə baxmayaraq, onların yaxınlarına dərin hüznlə başsağlığı verdi. Bildirdi ki, beynəlxalq insan haqları təşkilatlarının hesabatlarına görə, Xocalıda şəhid olan mülki insanların sayı 613 nəfərdir. 487 nəfər ağır yaralanmış, 1275 nəfər isə əsir alınmışdır. Təxminən 150 nəfər hələ də itkin düşmüş sayılır. Aparılan araşdırmalar nəticəsində bir çox cəsədin yandırıldığı, qətlə yetirilən onlarla soydaşımızın gözlərinin çıxarıldığı, cəsədlərin tanınmaz hala salındığı müəyyən olunmuşdur.
Xocalı soyqırımı ilə bağlı çıxış edən digər millət vəkili Ərtoğrul Kumçuoğlu bu qətliamı Azərbaycan və Türkiyənin yeni tarixinin ən acı, insanlıq tarixinin isə ən qara günlərindən biri kimi dəyərləndirmişdir. Bildirmişdir ki, dinc əhaliyə qarşı törədilən bu cinayət bir soyqırımı planının tərkib hissəsidir. Millət vəkili Azərbaycanda 1 milyona yaxın insanın qaçqın və məcburi köçkün durumuna düşdüyünü və ölkəmizə səfəri zamanı onların ağır vəziyyətini hər an ürəyində daşıdığını demişdir.
Parlamentin iclasında Azərbaycanın Ankaradakı səfiri Zakir Həşimov və millət vəkili Qənirə Paşayeva iştirak etmişlər.
Bölmənin digər xəbərləri
