Yağan güclü qar Gürcüstanda 40-a yaxın evin uçmasına səbəb olub
Tbilisi, 25 fevral, AZƏRTAC
Güclü qar yağması səbəbindən Gürcüstanın Lançxuti bələdiyyəsində çətin vəziyyət yaranıb. İlkin məlumata görə, 40-a qədər ev uçub.
AZƏRTAC xəbər verir ki, bu barədə Lançxuti bələdiyyəsinin başçısı Aleksandr Sarişvili məlumat yayıb.
Onun sözlərinə görə, güclü qar yağması səbəbindən Lançxuti bələdiyyəsində çətin vəziyyət yaranıb, qar yağmaqda davam edir. Əraziyə əlavə texnikalar səfərbər olunub, müxtəlif istiqamətlərdə yollar qardan təmizlənir, imkan daxilində əhali təxliyə edilir. Bir sıra inzibati vahidlər, o cümlədən Çoçxati, Qrmagele və Atsana işıqsız qalıb.
“Biz artıq əhalinin müəyyən hissəsini təxliyə etmişik - bəziləri otellərə yerləşdirilib, bəziləri qohumlarının yanında qalıb. Hazırkı məlumata görə, 40-a qədər ev uçub. Evlərə ziyan dəysə də, hələ ki, itkilər barədə məlumat yoxdur", - deyə Sarişvili vurğulayıb.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
