YAĞAN YAĞIŞLARLA ƏLAQƏDAR RESPUBLİKANIN ƏKSƏR ÇAYLARINDA SULULUQ ARTMIŞDIR
Bakı, 3 may (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamentinin verdiyi məlumata görə, son günlər yağan yağışlarla əlaqədar respublikanın əksər çaylarında sululuq artmış, Quba-Xaçmaz bölgəsi çaylarında isə qısamüddətli daşqın müşahidə olunmuşdur.
Hazırda ən yüksək sululuq Böyük Qafqazın Quba-Xaçmaz bölgəsi çaylarında müşahidə olunur və ongünlük normanın 150-266, Balakən-Şəki bölgəsi çaylarında 90-170, Lənkəran-Astara bölgəsi çaylarında normanın 120-145 faizini təşkil edir. Digər çaylarda isə normadan aşağı sululuq müşahidə edilir. Belə ki, Kiçik Qafqaz çaylarında sululuq normanın 60-70 faizini təşkil edir.
Kür çayının Qıraqkəsəmən məntəqəsindən Şəmkir su anbarına axım ongünlük normanın 115 faizi olmaqla 825 kubmetr/saniyə təşkil edir. Qanıx çayından Mingəçevir su anbarına axım isə ongünlük normanın 226 faizi olmaqla 448 kubmetr/saniyədir.
Son günlər yağan yağışlar nəticəsində Kür çayının aşağı axınında suyun səviyyəsində kəskin artım müşahidə olunmuşdur. Belə ki, son on gün ərzində Kürün Zərdab məntəqəsində suyun səviyyəsi 110, Surrada (Sabirabad) 125 santimetr, Şirvanda 115, Salyanda 105, Bankədə (Nefçala) 55, Araz çayının Novruzlu (Saatlı) məntəqəsində isə 137 santimetr artım qeydə alınmışdır.
Hazırda Kür çayının Zərdab məntəqəsində səviyyə 760, Surrada 881, Şirvanda 791, Salyanda 796, Bankədə 486 Araz çayının Novruzlu məntəqəsində isə 655 santimetrdir.
Bölmənin digər xəbərləri
