YANĞINSÖNDÜRƏNLƏR PEŞƏ BAYRAMLARINI QEYD ETMİŞLƏR
Görkəmli oftalmoloq alim, akademik Zərifə xanım Əliyevanın da xatirəsi anılmış, məzarı üstünə tər güllər düzmüşlər.
Yanğınsöndürənlər Şəhidlər xiyabanını da ziyarət etmiş, Azərbaycanın müstəqilliyi və ərazi bütövlüyü uğrunda canından keçmiş şəhidlərin xatirəsini ehtiramla anmış, “Əbədi məşəl” abidəsinin önünə əklil qoymuş, Baş Dövlət Yanğın Təhlükəsizliyi İdarəsinin əməkdaşı, Qarabağ uğrunda gedən döyüşlərdə həlak olmuş Milli Qəhrəman Cəmil Niftalıyevin məzarı üstünə gül dəstələri düzmüşlər.
Elə həmin gün Binəqədi rayonu Dövlət Yanğın Təhlükəsizliyi Xidmətinin binasında Azərbaycanın yanğın təhlükəsizliyi xidmətinin 88-ci ildönümü münasibətilə təntənəli mərasim keçirilmişdir. Buraya gələn fövqəladə hallar naziri general-polkovnik Kəmaləddin Heydərov nümayiş etdirilən müxtəlif növ müasir texnika ilə tanış olmuşdur.
Fövqəladə hallar naziri, general-polkovnik Kəmaləddin Heydərov şəxsi heyəti peşə bayramı münasibətilə təbrik edərək, qurumun yaranma tarixi barədə məlumat vermişdir. Nazir bildirmişdir ki, XX əsrin ikinci yarısında Azərbaycanın yanğından mühafizə orqanlarının əməkdaşları bir sıra xarici ölkələrdə iri və mürəkkəb yanğınların qarşısının alınmasında yüksək peşəkarlıq nümayiş etdirmişlər.
Azərbaycanın yanğın təhlükəsizliyi xidmətinin əməkdaşlarının respublikamızın ərazi bütövlüyü uğrunda gedən döyüşlərdə də yaxından iştirak etdiyini, şəhidlər verdiyini deyən nazir bildirmişdir ki, Azərbaycan yanğınsöndürənləri tarixin bütün dövrlərində həmişə xalq ilə birlikdə olmuş, çətin anda vətəndaşlarımızın təhlükəsizliyinin qorunması üçün əllərindən gələni əsirgəməmişlər.
Kəmaləddin Heydərov vurğulamışdır ki, ulu öndər Heydər Əliyev ikinci dəfə hakimiyyətə qayıtdıqdan sonra gördüyü qətiyyətli tədbirlər nəticəsində qısa zamanda Azərbaycan inkişaf yoluna çıxmışdır. Hökumətimiz yanğın təhlükəsizliyi xidmətinin hərtərəfli inkişafı, onun hazırlıq səviyyəsinin yüksəldilməsi, xarici dövlətlərlə təcrübə mübadiləsi aparılması, beynəlxalq tədbirlərdə iştirakı, maddi texniki bazasının möhkəmləndirilməsi, hüquqi bazanın təkmilləşdirilməsi, peşəkar kadrlarla təmin olunması üçün bütün zəruri tədbirləri görür.
Baş Dövlət Yanğın Təhlükəsizliyi İdarəsinin rəis müavini vəzifəsini icra edən daxili xidmət polkovniki Rza Xuduyev diqqətə çatdırmışdır ki, çətin və şərəfli peşəmiz xalq, dövlət, gündəlik həyatımız üçün vacib olan xidməti fəaliyyətimiz ölkəmizin rəhbərliyi tərəfindən yüksək qiymətləndirilir.
Veteran yanğınsöndürən Vaqif Məmmədov göstərilən diqqət və qayğıdan razılığını bildirmişdir.
Sonra Silahlı Qüvvələrin Ali Baş Komandanı, Prezident İlham Əliyevin müvafiq Sərəncamı ilə təltif edilmiş Baş Dövlət Yanğın Təhlükəsizliyi İdarəsinin 4 əməkdaşına “İgidliyə görə” medalları təqdim edilmişdir.
Tədbirdə mərasim iştirakçılarının Prezident İlham Əliyevə müraciəti oxunmuşdur.
Mərasimdə respublikanın daxili işlər naziri, general-polkovnik Ramil Usubov iştirak edirdi.
Sonra incəsənət ustalarının konserti oldu.
