Yaponiyada qadın ilk dəfə hərbi gəmilər qrupunun komandanı təyin edilib
Tokio, 6 mart, AZƏRTAC
Yaponiya hərbi-dəniz qüvvələrinin tarixində ilk dəfə qadın hərbi gəmilər qrupunun komandanı vəzifəsinin icrasına başlayıb.
AZƏRTAC xəbər verir ki, 44 yaşlı birinci dərəcəli kapitan Ryoko Azumanın öz vəzifələrinin icrasına başlama mərasimi Tokio körfəzinin girişində yerləşən Yokosuka hərbi-dəniz bazasında keçirilib.
Yeni komandanın rəhbərliyi altında dörd hərbi gəminin, o cümlədən Yaponiya hərbi-dəniz qüvvələrinin nəhəng “İzumo” helikopter daşıyan gəmisinin olacağı da bildirilir. Bu gəmilərdə ümumilikdə 1000-dən çox şəxsi heyət xidmət edir. Yerli KİV-lərin yaydığı məlumatlara görə, hazırda “İzumo” gəmisinin əsaslı şəkildə modernləşdirilməsi planlaşdırılır ki, bu da hərbi “F-35B” təyyarələrini göyərtəyə qəbul etmək imkan verəcək.
R.Azuma Yaponiya tarixində ilk dəfə 2016-cı ildə hərbi gəminin kapitanı təyin edilən qadındır.
Son illər ölkənin silahlı qüvvələrinə qadınların cəlb olunması işi sürətlənib. Belə ki, bu yaxınlarda onlara hərbi təyyarələrin pilotu olmaq icazəsi də verilib.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
