Yaponiyanın Kitakyuşu şəhərində bədii gimnastika üzrə 38-ci dünya çempionatı başlayıb
Tokio, 27 oktyabr, AZƏRTAC
Oktyabrın 27-də Yaponiyanın Kitakyuşu şəhərində bədii gimnastika üzrə 38-ci dünya çempionatı başlayıb.
AZƏRTAC xəbər verir ki, yarışların birinci günündə gimnastika çoxnövçülüyünün iki ayrı növü - halqa və topla yarışlar keçirilib.
Bədii gimnastika üzrə dünya çempionatı 1996-cı ildən bəri ilk dəfə Olimpiya Oyunları ilə eyni ildə keçirilir. İlkin olaraq çempionatın Kopenhagendə keçirilməsi planlaşdırılsa da, Danimarkanın hökumət strukturları yarışların təşkilindən imtina edib.
Kitakyuşuda doqquz dəst medal uğrunda yarışların keçiriləcəyi bildirilir. Oktyabrın 28-də halqa və lentlərlə çıxış edən idmançılar arasında dünya çempionları məlum olacaq. Növbəti gün isə komanda turnirinin və qrup çoxnövçülüyünün qalibləri bilinəcək. Şənbə günü çoxnövçülük üzrə qaliblərə mükafatlar təqdim olunacaq. Yarışların sonuncu günündə isə qrup çoxnövçülüyünün müxtəlif növləri üzrə qaliblər müəyyən ediləcək.
Azərbaycan idmançılarının da qatıldıqları çempionat fərdi çıxışlarla başlayıb. Azərbaycan gimnastları Zöhrə Ağamirova və Arzu Cəlilova halqa ilə hərəkətləri nümayiş etdiriblər. Z.Ağamirova 21,400, A. Cəlilova isə 21,350 xal toplayıblar.
Həmin gün idmançılarımız topla hərəkətləri də nümayiş etdiriblər. Topla hərəkətə görə A.Cəlilova 22,600 bal, Z.Ağamirova isə 21,150 bal qazanıblar.
Beləliklə, iki çıxışdan sonra A. Cəlilova 43,950, Z.Ağamirova isə 42,550 xal toplayıblar.
Axşam saatlarında halqa və top üzrə final yarışları keçiriləcək və Kitakyuşuda ilk medalçılar müəyyənləşəcəklər. Sabah isə idmançılarımız gürz və lentlə çıxışlarını təqdim edəcəklər. Azərbaycanı fərdi yarışlarda Nərmin Bayramova təmsil edəcək.
Oktyabrın 29-da isə qrup komandalarının yarışı keçiriləcək. Bu yarışda Zeynəb Hümmətova, Ləman Əlimuradova, Güllü Ağalarzadə, Yelizaveta Luzan və Daria Sorokinadan ibarət komandamız mübarizə aparacaq.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
