Yeni layihəmi “Yaşıl dünya naminə həmrəylik ili”nə həsr etmişəm – istedadlı pianoçu
Onun ən böyük arzusu Azərbaycanı hər zaman layiqincə təmsil etməkdir
Bakı, 24 iyul, Gülay Nəzərova, AZƏRTAC
AZƏRTAC Beynəlxalq müsabiqələr laureatı olmuş Azərbaycanın gənc istedadlı musiqiçiləri haqqında məqalələr silsiləsini davam etdirir.
Növbəti həmsöhbətimiz Avstriyanın Anton Brukner adına Konservatoriyasının tələbəsi, Beynəlxalq və respublika müsabiqələr laureatı, Qran-Pri mükafatçısı Ayan Məmmədlidir.
Ayanın 22 yaşı var. O, 2008-2019-cu illərdə Türk Dünyası Araşdırmaları Vakfının Bakı Atatürk Liseyində orta ixtisas təhsili, paralel olaraq, 2008-2019-cu illərdə Bakı şəhər Tofiq Quliyev adına 12 nömrəli onbirillik musiqi məktəbində, Əməkdar müəllim Nazilə Yaqubovanın sinfində fortepiano ixtisası üzrə təhsil alaraq, hər iki məktəbi əla qiymətlərlə və qırmızı diplomla bitirib.
Onun musiqiyə olan sevgisi, həvəsi və rəğbəti çox kiçik yaşlarından yaranıb. Hələ 3-4 yaşlarında ailəsi onun bu sahəyə yönəlməsinə dəstək olub. İlk təhsilini Bakı şəhər Tofiq İsmayılov adına Uşaq Gənclər Yaradıcılıq Sarayında alıb. Orada artıq 4-5 yaşlarında bəzi kiçik uşaq mahnılarını pianoda böyük həvəslə ifa edib. 6 yaşı olanda isə Bakı şəhər T.Quliyev adına 12 nömrəli onbirillik musiqi məktəbində “Fortepiano” ixtisası üzrə təhsil alıb. Ayanın anası musiqi beşiyimiz olan Şuşadandır.
Ayan 9 yaşında olanda ilk dəfə Estoniyanın Narva şəhərində keçirilən İ.S.Bax adına Beynəlxalq Piano Müsabiqəsinə qatılaraq, iki nominasiya üzrə qalib olub. “Təhsil aldığım musiqi məktəbinin tarixində fortepiano ixtisası üzrə Beynəlxalq müsabiqə laureatı adını qazanan ilk şagird oldum. Daha sonra İtaliya, Malta, Avstriya, İngiltərə, Yaponiya, Türkiyə, Rusiya və Azərbaycanda keçirilən beynəlxalq müsabiqələrdə iştirak edərək, hər birində qalib adını qazandım. Eyni zamanda, Niderlandda, Almaniyada, Danimarkada müxtəlif mühüm tədbirlərdə solo konsertlərlə uğurlu çıxış etdim. Bütün bu müsabiqə və konsertlərdə Azərbaycanı yüksək səviyyədə təmsil etməyin məsuliyyətini daşıyırdım. Səfərlərdə bir çox əcnəbi musiqiçilər, sənət adamları ilə tanış olurduq. Bu görüşlərin sayəsində mən müxtəlif illərdə piano üzrə ustad dərsləri alaraq, xüsusi sertifikatlarla təltif olunmuşam. Müsabiqələrin birində, hələ 14 yaşım olanda dünyanın mədəniyyət beşiyi sayılan Avstriyanın Salzburq şəhərində keçirilən yarışmada Qran-Pri mükafatına layiq görüldüm. Bundan sonrakı hədəfim Avropada nüfuzlu ali məktəbə daxil olmaq idi. Çünki orada musiqinin sirlərini öyrənmək imkanım var idi. Düşündüm ki, klassik Avropa musiqisinə elə onun öz məkanında yiyələnmək mənə daha gözəl nəticələr verəcək”, - deyə Ayan Məmmədli diqqətə çatdırıb.
Bildiyimiz kimi, Avstriyanın Anton Brukner adına Konservatoriyasının bakalavr pilləsinə qəbul imtahanları heç də asan deyil. Lakin, Ayanın uzun illər Azərbaycanın və Avropanın böyük səhnələrində uğurlu çıxışları ona xeyli təcrübə qazandırıb. Həmin illər ərzində ustad sənətkarlar və müəllimlərdən aldığı biliklər sayəsində bu çətin sınaqdan üzüağ çıxmağı bacarıb. Həmin Konservatoriyanın bakalavr pilləsinin tələbəsi adını qazanan ilk və hələki yeganə azərbaycanlı olub.
“Avropada təhsil aldığım bu illər ərzində ən böyük arzularımdan biri orada doğma yurdumun milli musiqilərini təbliğ etmək idi. Mən bu arzuma nail oldum. Beləki, Prezident İlham Əliyevin Sərəncamı ilə 2022-ci ilin “Şuşa İli” elan edilməsiylə bağlı, milli musiqilərimiz, muğamlarımız və xalq mahnılarımızdan ibarət “Azərbaycandan dünyaya musiqi töhfəsi” adlı üç dildə maraqlı bir layihə hazırladım. 2022-ci ildə bu layihənin Haaqa, Vyana, Salzburq, Linz, Oslo və Budapeşt şəhərlərində çox maraqlı təqdimatları keçirilib. Milli bəstəkar və xalq mahnılarımız yerli tamaşaçıların çox böyük marağına səbəb oldu”, – deyə piano ifaçısı vurğulayıb.
Harada olmasından asılı olmayaraq Ayanın qəlbi hər zaman Azərbaycanla döyünür. O, Vətən sevgisini hər bir konsertdə daha aydın göstərir, milli musiqimizin özünəməxsus incəliklərini bütün dünyaya nümayiş etdirmək üçün hər zaman böyük səylə çalışır. “2023-cü ilin “Heydər Əliyev İli” elan olunması ilə bağlı Ulu Öndərimizə həsr olunmuş və onun çox sevdiyi mahnılardan ibarət olan növbəti layihəmdəki əsərləri Avstriyanın Vyana və Linz şəhərlərində, həmçinin 2023-cü il mayın 10-da Cənubi Amerikada, Argentinanın paytaxtı Buenos Ayres şəhərində Ümummilli Liderin anadan olmasının 100 illiyi münasibətilə keçirilən möhtəşəm tədbirlərdə solo konsertlə xarici tamaşaçılar qarşısında çıxış etdim”, - deyə A.Məmmədli diqqətə çatdırıb.
Sevindirici haldır ki, azərbaycanlı pianoçunun COP29-a aid hazırladığı musiqi layihəsinin Danimarkada təqdimatı olub. Konsert Danimarka-Azərbaycan Gənclər Cəmiyyətinin təşkilatçılığı və Azərbaycan Respublikası Diasporla İş üzrə Dövlət Komitəsinin dəstəyi ilə “Yaşıl dünya naminə həmrəylik ili” çərçivəsində təşkil edilib. Ayan Məmmədli özü bu barədə deyir: “Mən də hamı kimi, yaşıl təbiəti, dənizi, çayları, təmiz ekologiyanı çox sevirəm. Bildiyiniz kimi, bütün dünyada ekologiyanın qorunması, zəngin enerji mənbəyinin əldə edilməsi çox vacib məsələdir. Hər kəs bunun üçün çalışmaqdadır. Hər il dünyanın müxtəlif yerlərindən hökumət nümayəndələri COP-da toplaşaraq, iqlim dəyişmələrinin qarşısının alınması və fəsadlarının aradan qaldırılması istiqamətində birgə səylər göstərmək üçün çağırışlar edir. Bu il bu mötəbər tədbirin növbəti toplantısı, mənim doğma vətənim Azərbaycanda keçiriləcək. Hazırda bu möhtəşəm tədbirlə bağlı çox ciddi hazırlıqlar görülür. Mən də bu işə öz töhfəmi verməyə çalışdım. Bu məqsədlə də, bir musiqiçi kimi, bütün insanlara yaşıl və təmiz dünyamız naminə öz musiqimlə çağırışlar etmək istəyirəm. Bugünkü konsertdə sizlərə ifa edəcəyim əsərlərdə Azərbaycanımızın çox gözəl təbiətinə və iqlimə həsr olunmuş musiqi əsərləri səslənəcək”.
Qeyd edək ki, onun COP29-la bağlı payız aylarında da Avstriyada yenidən konserti nəzərdə tutulur.
Ayan hər zaman doğma vətənini fəal və yaradıcı bir gənc kimi layiqincə təmsil etməyi özünə borc və vəzifə bilir. Onun ən böyük arzusu, Azərbaycanı hər zaman daha böyük salonlarda layiqincə təmsil etməkdir.
Bölmənin digər xəbərləri
