SİYASƏT
Yeni reallıqlar yaradan Lider
Bakı, 24 dekabr, AZƏRTAC
2020-ci il noyabrın 10-da Azərbaycan çox böyük tarixi Qələbəyə imza atdı. Bu hadisə Azərbaycan xalqının və dövlətinin şanlı Zəfəri kimi tarixə düşdü. Qırx dörd günlük Vətən müharibəsində Müzəffər Ali Baş Komandanımızın rəhbərliyi ilə bütün döyüş əməliyyatları yüksək şəkildə həyata keçirilərək, ölkəmizin ərazi bütövlüyü yenidən bərpa edildi.
Təbii ki, müharibə zamanı qazandığımız Zəfər şanlı Ordumuzun peşəkarlığı, cəsurluğu ilə yanaşı, döyüş əməliyyatlarına birbaşa rəhbərlik edən Ali Baş Komandanımızın güclü döyüş strategiyasının və iradəsinin nəticəsi idi.
Dövlətimizin başçısı prinsipiallığı, qətiyyəti ilə 28 il sonra işğal altındakı doğma torpaqlarımızda Azərbaycan bayrağını yenidən ucaltdı.
Bunu AZƏRTAC-a açıqlamasında Milli Məclisin deputatı Şahin Seyidzadə bildirib.
Deputat qeyd edib ki, Vətən müharibəsinin gedişi özlüyündə bir çoxlarının inana bilmədiyi reallığı üzə çıxararaq, Azərbaycan Ordusunda aparılan yenidənqurmanın səmərəliliyini bütün dünyaya göstərdi.
Müharibənin gedişində yeni texnologiyalardan istifadə edilməsi ölkənin ordu donanmasının nə dərəcədə yüksək təminatlı olduğunu dosta və düşmənə bir daha sübut etdi. Müharibənin yazılmamış qanunlarının əksinə olaraq, Azərbaycanın minimum itki verməklə inanılmaz Qələbə qazanması aparılmış əməliyyatların peşəkarlığından xəbər verir.
“Ermənistanın 30 il ərzində yaratdığı “qalib ordu” mifi, sadəcə, 44 günə tamamilə darmadağın edildi. Müharibənin gedişatı zamanı Ermənistan və tərəfdaşları tərəfindən hərbi əməliyyatları dayandırmaq üçün Azərbaycan rəhbərliyinə açıq şəkildə diplomatik və siyasi təzyiqlər göstərilməsi, Prezident İlham Əliyevin isə bütün bunlara məhəl qoymadan öz siyasi iradəsini güclü bir şəkildə nümayiş etdirməsi, eləcə də dövlətçilik prinsiplərindən geri dönməyəcəyini göstərməsi Azərbaycan xalqının birliyini bir daha möhkəmlədirdi.
Nəticədə Ali Baş Komandanın rəhbərliyi ilə aparılan “Dəmir yumruq” əməliyyatı sayəsində ölkəmizin ərazi bütövlüyü bərpa olundu və Azərbaycan müharibədə şanlı Qələbə qazandı.
Ümumiyyətlə, Azərbaycan heç vaxt müharibə tərəfdarı olmayıb. Müharibədən əvvəlki dövrlərdə də Azərbaycan bu məsələni sülh yolu ilə həll etməyə çalışıb. Ermənistan dövləti isə bu sülh danışıqlarının aparılmasında maraqlı olmayıb və öz mənfur siyasətini davam etdirib. Ötən 30 ildə beynəlxalq təşkilatların da bu məsələnin həlli ilə bağlı passiv iştirakı nəticəsində illərdir aparılan sülh danışıqları nəticəsiz qalıb” , - deyə Ş.Seyidzadə bildirib.
Deputat vurğulayıb ki, Müzəffər Ali Baş Komandanın “Dəmir yumruq”la düşməni 44 günə məğlub etməsi bölgədə tam yeni reallıqlar yaratdı. Bu reallıq ümummilli lider Heydər Əliyevin vəsiyyətinin və Azərbaycan xalqının arzusunun gerçəkləşməsi idi. Bu reallığı yaradan əzmkar lider, uzaqgörən dövlət xadimi Prezident İlham Əliyev adını tarixə qızıl hərflərlə yazdırdı. Prezident İlham Əliyevin rəhbərliyi ilə işğaldan azad olunmuş ərazilərimizdə başladılan sürətli yenidənqurma və bərpa işlərinin miqyası hər ötən gün daha da artır.
Postmüharibə dövründə görülmüş işlərə nəzər saldıqda işğaldan azad olunan bölgələrimizdə aparılan yenidənqurma və təmir-bərpa işlərinin tempi Qarabağın qısa zamanda Cənubi Qafqazın ən müasir yaşayış məskəninə çevriləcəyindən xəbər verir. Bu dövrün ən mühüm hadisələrinə diqqət yetirdikdə, Cənubi Qafqazda yeni reallıqlar yaratmış 10 noyabr tarixli Bəyanatının xüsusi əhəmiyyətini vurğulamaq yerinə düşər. Bu sənəd bölgədəki sülhün və təhlükəsizliyin təminatı olmaqla yanaşı, beynəlxalq ictimaiyyət tərəfindən Azərbaycanın ərazi bütövlüyünə heç zaman şübhə ilə yanaşılmamasının bariz göstəricisidir. Məhz bu reallıqlar Prezident İlham Əliyevin xüsusi fitri zəkası, səbirli və qətiyyətli mövqeyi nəticəsində yaranıb.
Postmüharibə dövrünün reallıqları sırasında Zəngəzur dəhlizinin açılması məsələsinin önəmini vurğulayan Ş.Seyidzadə dəhlizin regionumuz üçün yeni imkanlar yaradacağını bildirib.
“Prezident İlham Əliyevin bərpa olunacaq sahələrdə müasir texnologiyaların tətbiqini əsas məsələlərdən hesab etməsi yaxın vaxtlarda Qarabağın regionunu ən inkişaf etmiş bölgəsi olacağını deməyə əsas verir.
Bu gün dünya birliyi artıq yeni reallıqlarla üz-üzədir. İstər müharibədən əvvəl, istər müharibə dövründə, istərsə də postmüharibə dönəmində dünyada etibarlı tərəfdaş imicini özündə ehtiva edən dövlətimizin başçısı İlham Əliyevin güclü siyasi strategiyası və sürətli manevretmə bacarığı nəticəsində regionun postmüharibə gündəliyini də bu gün Azərbaycan müəyyənləşdirir”, - deyə deputat fikirlərini yekunlaşdırıb.