Yeni tədris ilində təhsilin keyfiyyətinin yüksəldilməsi əsas hədəflərdəndir
Bakı, 15 sentyabr, AZƏRTAC
Yeni tədris ilinin başlanması təhsil sistemində görülən işlərin qiymətləndirilməsi, qarşıda duran vəzifələrin müəyyənləşdirilməsi və yeni prioritetlərin nəzərdən keçirilməsi baxımından mühüm mərhələdir. Azərbaycanda təhsil infrastrukturunun yenilənməsi, təhsilin əlçatanlığının genişləndirilməsi və müxtəlif təhsil pillələri üzrə islahatların davam etdirilməsi istiqamətində mühüm addımlar atılır. 2026–2027-ci tədris ilində əsas hədəflərdən biri də təhsilin keyfiyyətinin daha da yüksəldilməsidir.
Bu fikirləri AZƏRTAC-a açıqlamasında Azərbaycan Respublikası Təhsil Cəmiyyəti İctimai Birliyinin İdarə Heyətinin sədri Murad Ağalarov söyləyib. O qeyd edib ki, müasir dövrdə təhsil sisteminin uğuru yalnız şagirdlərin əldə etdiyi biliklərlə deyil, onların qazandığı bacarıq və kompetensiyalarla ölçülür. Bu baxımdan tam orta təhsildə təmayülləşmənin genişləndirilməsi mühüm əhəmiyyət daşıyır. X–XI siniflərdə təmayül tədris modelinin əhatə dairəsinin 14 pilot məktəbdən 90 məktəbə, 13 şəhər və rayondan 46 şəhər və rayona genişləndirilməsi şagirdlərin maraq və qabiliyyətlərinə uyğun təhsil almasına, məktəbdə daha məqsədyönlü hazırlığın təşkilinə imkan verəcək.
Murad Ağalarov Azərbaycan dilinin tədrisi ilə bağlı yeni yanaşmaların da diqqətəlayiq olduğunu vurğulayıb. Qeyd edib ki, tədrisi digər dillərdə aparılan siniflərdə “Azərbaycan dili – dövlət dili kimi” fənninin həftəlik dərs saatlarının artırılması dövlət dilinin daha yüksək səviyyədə mənimsənilməsinə şərait yaradır. Bu siniflərdə təxminən 150 min şagirdin təhsil aldığını nəzərə alsaq, atılan addımın əhəmiyyəti daha aydın görünür.
Yeni tədris ilində müəllimlərin peşəkar inkişafı və sertifikatlaşdırma prosesi də mühüm istiqamətlərdəndir. İndiyədək 104 min təhsilverənin sertifikatlaşdırmaya cəlb olunması və bunun nəticəsində on minlərlə müəllimin əməkhaqqında artımların təmin edilməsi müəllim əməyinin keyfiyyət və nəticə əsasında qiymətləndirilməsi baxımından əhəmiyyətli mexanizm kimi dəyərləndirilə bilər.
Təhsil infrastrukturunun yenilənməsinə də toxunan M.Ağalarov bildirib ki, bu il ölkə üzrə 37 yeni tədris binasının fəaliyyətə başlaması, 600 məktəbdə təmir işlərinin aparılması və azad edilmiş ərazilərdə daha 15 təhsil müəssisəsinin istifadəyə verilməsi görülən işlərin miqyasını göstərir.
Xüsusilə “Böyük Qayıdış” Dövlət Proqramı çərçivəsində yeni məktəb və məktəbəqədər müəssisələrin istifadəyə verilməsi yalnız infrastruktur layihəsi deyil. Bu proses azad edilmiş ərazilərə qayıdan ailələrin sosial həyatının formalaşması və həmin ərazilərdə dayanıqlı yaşayış mühitinin yaradılması baxımından da strateji əhəmiyyət daşıyır.
Ali təhsil sahəsindəki göstəricilərə toxunan M.Ağalarov qeyd edib ki, 2026–2027-ci tədris ilində ali məktəblərə 76 mindən çox abituriyentin qəbul olunması “Azərbaycan Respublikasının 2022–2026-cı illərdə sosial-iqtisadi inkişaf Strategiyası”nda nəzərdə tutulan illik 75 min nəfərlik hədəfin vaxtından əvvəl reallaşdırıldığını göstərir. Qarabağ Universitetinə 49 ixtisas üzrə 1235 tələbənin qəbul olunması və yüksək nəticə göstərən abituriyentlərin sayının əhəmiyyətli dərəcədə artması bu ali təhsil müəssisəsinin Azərbaycanın yeni təhsil və inkişaf modelində xüsusi yer tutmağa başladığını göstərir.
M.Ağalarov müasir dövrdə təhsilin qarşısında duran əsas çağırışlardan birinin rəqəmsal transformasiya və süni intellekt olduğunu diqqətə çatdırıb. Bildirib ki, Azərbaycan təhsilində bu istiqamətdə artıq müəyyən addımlar atılır. Növbəti mərhələdə əsas məsələ texnologiyanın tədris prosesinə sadəcə daxil edilməsi deyil, ondan şagirdlərin düşünmə, yaradıcılıq, problem həlletmə və tənqidi yanaşma bacarıqlarının inkişafına xidmət edən vasitə kimi istifadə olunmasıdır.
Müsahibimiz məktəb, müəllim, valideyn və cəmiyyət arasında əməkdaşlığın gücləndirilməsini də vacib istiqamət kimi qeyd edib. Onun sözlərinə görə, təhsilin keyfiyyətinin yüksəldilməsi yalnız dövlət qurumlarının və məktəbin vəzifəsi deyil. Valideynlərin, ictimai təşkilatların və digər sosial tərəfdaşların prosesə daha fəal cəlb olunması bütövlükdə təhsil ekosisteminin inkişafına mühüm töhfə verə bilər. Dövlət siyasəti, təhsil ictimaiyyəti və cəmiyyətin birgə səyləri nəticəsində yeni tədris ili Azərbaycan təhsilinin keyfiyyətcə yeni mərhələyə keçidi baxımından uğurlu nəticələrlə yadda qalacaq.
Müxbir - Xatirə Cəfərova
Bölmənin digər xəbərləri
