ZAQATALADA BƏLƏDİYYƏ KOMANDALARI ARASINDA FUTBOL BİRİNCİLİYİ KEÇİRİLMİŞDİR
Zaqatala, 18 sentyabr (AZƏRTAC). Zaqatalada bələdiyyə komandaları arasında futbol üzrə rayon birinciliyinə yekun vurulmuşdur. Rayon Gənclər və İdman İdarəsinin tədbirlər planına uyğun olaraq keçirilən və üç aya yaxın davam edən birincilikdə 23 komanda mübarizə aparmışdır. Yarışlar dairəvi sistem üzrə 4 zonada keçirilmişdir.
Sentyabrın 17-də Zaqatala Olimpiya-İdman Kompleksində keçirilən birinciliyin final oyununda Fındıqlı və Yolayrıc bələdiyyələrinin komandaları qarşılaşmışlar. Final oyununu rayon rəhbərliyi, eləcə də yüzlərlə futbol azarkeşi izləmişdir. Gərgin mübarizə şəraitində keçən oyunda Fındıqlı komandası 2-0 hesabı ilə qalib gələrək birinciliyin qalibi adını qazanmışdır.
Final oyunu başa çatdıqdan sonra rayon icra hakimiyyətinin başçısı Mübariz Əhmədzadə qalib komandanın oyunçularını təbrik etmiş, onlara fəxri fərman və qiymətli hədiyyələr təqdim etmişdir. Birincilikdə fərqlənmiş digər komandaların futbolçuları da mükafatlandırılmışlar.
Bölmənin digər xəbərləri
