Zəlzələ bölgəsində qəzalı vəziyyətə düşmüş evlərin sökülməsinə başlanılmışdır
Zaqatala, 18 may (AZƏRTAC). Fövqəladə Hallar Nazirliyinin Zaqatala şəhərində yaradılmış operativ qərargahından AZƏRTAC-a bildirmişlər ki, ilkin olaraq işçi qrupları tərəfindən tam qəzalı vəziyyətə düşdüyü müəyyən edilən evlərin sökülməsinə başlanmışdır. Söküntü işləri podratçı tikinti təşkilatları tərəfindən həyata keçirilir. Artıq zəlzələ bölgəsində 8 tikinti təşkilatının bazaları fəaliyyət göstərir.
Belə bazalardan biri də “Gilan-İnşaat” MMC tərəfindən Gözbarax kəndində yaradılmışdır. Bazanın nümayəndəsi Elxan Məmmədov AZƏRTAC-a bildirmişdir ki, hazırda bazaya Bakı şəhərindən lazımi tikinti materialları - sement, mişar daşı, taxta və sair daşınır. Mühəndis və fəhlələrin qalması üçün bazada yardımçı tikililər də inşa olunur. Göstəriş verilən kimi evlərin tikintisinə başlanılacaqdır.
Bölmənin digər xəbərləri
