Zeytun yağının ixracı 7 milyon dolları üstələyib
Bakı, 17 noyabr, AZƏRTAC
Azərbaycanda kənd təsərrüfatı sahəsi qeyri-neft sektorunun əsas aparıcı qüvvələrindən biri kimi iqtisadiyyatın inkişafında önəmli rol oynayır. Məhsul çeşidinin artırılması, təsərrüfatların ixtisaslaşması və regionlar üzrə istehsal strukturunun yenilənməsi həm daxili bazarın dayanıqlılığını gücləndirir, həm də ixrac coğrafiyasının genişlənməsinə şərait yaradır. Son illər dövlət tərəfindən həyata keçirilən institusional yeniliklər və müasir aqrar həllərin tətbiqi sektorun məhsuldarlıq səviyyəsini artırıb, o cümlədən kənd təsərrüfatının artıq ənənəvi sahəsinə çevrilmiş zeytunçuluğun inkişafına mühüm töhfə verib.
AZƏRTAC xəbər verir ki, Azərbaycanda yeni inkişaf mərhələsinə qədəm qoyan zeytunçuluq artan templərlə genişlənir. 2024-cü ildə sahəsi 6,4 min hektardan çox olan zeytun bağlarından ümumi məhsul yığımı 11 min tonu keçib. Bu, 2023-cü illə müqayisədə 2 dəfə, son 5 ildə isə təxminən 10 dəfə çoxdur. Məhsulun ən çox yığıldığı Abşeron-Xızı iqtisadi rayonunda hesabat ilində 6,7 min ton məhsul əldə olunub ki, bu da illik müqayisədə 2 dəfədən çoxdur.
Artan əkin sahələri və məhsul yığımı ölkəmizdə zeytunun emalı və dəyər zəncirinin son mərhələsi olan zeytun yağı istehsalını təşviq edir. Zeytun yağı Azərbaycanın xarici bazarlarda təqdim etdiyi əsas zeytun mənşəli ixrac məhsuluna çevrilib. 2024-cü ildə zeytun yağının ixracı 82 faiz artaraq 7 milyon dolları üstələyib. Əsas ixrac bazarımız Rusiya olub. Bununla yanaşı, zeytun yağı İspaniya, İsrail, Türkiyə və digər ölkələrə ixrac olunub.
İstehsal və ixracda müşahidə edilən artım zeytunçuluq sahəsində keyfiyyət standartlarının təkmilləşdirilməsi, qlobal səviyyədə məhsullarımızın rəqabət qabiliyyətinin artırılması, daha yüksək keyfiyyət tələbləri olan yeni bazarlara çıxış imkanlarımızın genişləndirilməsini zəruri edir. Bu kontekstdə Azərbaycanın qlobal zeytun sənayesini tənzimləyən əsas platformalara qoşulması xüsusi əhəmiyyət kəsb edir.
Qeyd edək ki, Azərbaycan 2024-cü ilin may ayında zeytun yağı və süfrəlik zeytun istehsal və istehlak edən ölkələri bir araya gətirən və BMT-nin himayəsi altında fəaliyyət göstərən Beynəlxalq Zeytun Şurasına üzv qəbul edilib. Bunun nəticəsində Azərbaycan Şuraya üzv ölkələr ilə tədqiqat, təlim və texnologiya transferi üzrə əməkdaşlıq etmək imkanı əldə edib. Həmçinin ölkəmiz bu istiqamətdə ticarət standartlarını inkişaf etdirmək və təcrübə mübadiləsini intensivləşdirmək məqsədilə özəl və dövlət sektorunun iştirakı ilə təşkil olunan qlobal tədbirlərdə iştirak etmək fürsəti qazanıb.
Ölkəmizin Beynəlxalq Zeytun Şurasına üzv olması məqsədilə Prezident İlham Əliyev tərəfindən 2024-cü ilin fevral ayında “Zeytun yağı və süfrə zeytunlarına dair 2015-ci il tarixli Beynəlxalq Saziş”ə qoşulmaq haqqında Azərbaycan Respublikasının Qanunu təsdiqlənib.
Bölmənin digər xəbərləri
