Bakı, 1 fevral, AZƏRTAC

İtaliyanın “Askanews” portalı “ARDNF-in 20 yaşı tamam olur. Azərbaycanın suveren fondu İtaliyada fəaliyyətini genişləndirir” sərlövhəli məqalə yayıb.

AZƏRTAC xəbər verir ki, məqalədə 38,5 milyard dollarlıq portfeli ilə Azərbaycanın suveren fondu olan Dövlət Neft Fondunun (ARDNF) İtaliyanı investisiya üçün favorit istiqamətlərdən biri hesab etdiyi bildirilir. Qeyd edilir ki, bu il fəaliyyətinin 20 ili tamam olan və investisiya idarəçiliyində şəffaflıq nümayiş etdirdiyinə görə müxtəlif beynəlxalq qiymətləndirmələrdə yer alan fond “Truman Index”ə görə Norveç, Yeni Zelandiya və ABŞ-dan sonra yüzlükdə dördüncü yerdə qərarlaşıb.

Fondun icraçı direktorunun müavini İsrafil Məmmədov deyir ki, ARDNF-in İtaliyanın “Cassa Depositi Prestiti” bankı və Strateji Fondu ilə razılaşması var və orada fəaliyyətini genişləndirmək fikrindədir. Təxminən 40 milyard dollar vəsaitdən ibarət ümumi portfelin (ÜDM-in 80 faizinə bərabər) 35 faizi Avropa İttifaqı ölkələrinə investisiya olunub. 2001-ci ildən ARDNF-in ilk real gəlir əldə etdiyi vaxtdan bəri neft-qaz gəlirlərinin, tranzit gəlirləri, investisiyalar və dividend gəlirləri sayəsində fonda 138 milyard dollar vəsait daxil olub.

“Ölkəmizin müstəqilliyinin bərpasından sonra ilk illərdə həm iqtisadi, həm də siyasi baxımdan çox çətin illər keçirdik: elektrik enerjisi, qaz yox idi, yollar pis vəziyyətdə idi, ölkədə xaos hökm sürürdü. 1994-cü ildə dünyanın bir neçə ən böyük enerji şirkəti ilə “Əsrin müqaviləsi”ni imzaladıq və hər şey həmin vaxtdan başladı”, - deyə İ.Məmmədov bildirir.

Məqalədə qeyd edilir ki, indi o illər mənzərəsini müasir göydələnlərin tamamilə dəyişdiyi Bakıdan işıq ili qədər uzaq görünür. ARDNF əsas məqsədi neftdən gələn gəliri toplamaq, həmçinin gələcək nəsillərə investisiyalar yatırmaq üçün nəzərdə tutulmuş əsas fonddur. İnvestisiya olunan vəsaitin əsas hissəsini 1992-1994-cü illər münaqişəsinin nəticəsi olaraq Ermənistan silahlı qüvvələri tərəfindən işğal edilmiş Dağlıq Qarabağdan gələn məcburi köçkünlər üçün nəzərdə tutulmuş layihələr, həmçinin su kəməri və irriqasiya sistemlərinin, Bakı-Tbilisi-Qars dəmir yolu xəttinin inşası, xaricdə təhsil alan gənclər üçün təqaüd proqramları təşkil edir. ARDNF-in sərmayə portfelinin yarısı dollar, 35 faizi avro, 5 faizi funt sterlinq, qalan 10 faizi başqa valyutalardan ibarətdir.

İcraçı direktorun müavini bildirir ki, ARDNF tam şəffaflığın təmin olunmasını vacib hesab edir. Elə resursların dövlət hesabına köçürülməsi mexanizmi haqqında da eyni şeyi demək olar. Dövlət hər il fonddan vəsait götürür və büdcəyə köçürür. Biz konsolidasiya edilmiş dövlət büdcəsinin tərkib hissəsiyik. Müntəzəm hesabatları dərc etməklə şəffaflığın təmini üçün əlimizdən gələni edirik. Bundan başqa, Böyük Britaniyanın sabiq Baş naziri Toni Bleyer tərəfindən təklif olunan və üç tərəfi - cəmiyyəti, dövləti və QHT-ləri özünə cəlb edən şəffaflıq sənədini də imzalamışıq. Onlar kənardan auditor təyin edirlər və uyğunsuzluqlar aşkar edilən zaman araşdırılır. Bundan əlavə, parlament səviyyəsində audit var və hazırda dövlət investisiyalarımızı qiymətləndirmək üçün başqa audit şirkəti cəlb edib.

“Beynəlxalq iqtisadiyyatın göstərə biləcəyi təsirlərdən narahatlıq varmı” sualına cavabında o deyir: “Biz uzunmüddətli hədəflər üçün çalışırıq. Təbii ki, dəyişkənlik narahat edir, həddindən artıq ehtiyatlı olmalıyıq, çünki böyük vəsaiti idarə edirik”.

Məqalədə qeyd edilir ki, ARDNF 20 illiyi münasibətilə sentyabr-oktyabr ayları arasında daha məsuliyyətli və daha əhatəli investisiyalar barədə müzakirə aparmaq üçün beynəlxalq konfrans təşkil edəcək. Dünyanın əsas fondları və pensiya fondu kimi digər qurumlar, eyni zamanda, Dünya Bankı konfransa dəvət olunacaq. İtaliyaya gəldikdə isə, baxmayaraq ki təqvimdəki ilk səfər noyabr ayına nəzərdə tutulub, bu ölkə hər zaman ARDNF-in diqqət mərkəzindədir.