Əkinlərin suvarma suyu ilə təmin olunması diqqətdə saxlanılır VİDEO
Şəmkir, 24 mart, AZƏRTAC
Bu günlərdə rayonlarımızda əkin işlərinin qızğın çağıdır. Bol məhsulun təməlini qoyan fermerlər əkinlərin suvarılmasına xüsusi önəm verirlər. Şəmkir Suvarma Sistemləri İdarəsi də bu baxımdan üzərinə düşən işi uğurla həyata keçirir, əkinlərin suvarma suyu ilə təmin olunmasını diqqətdə saxlayır.
AZƏRTAC xəbər verir ki, Şəmkirdə su itkisinin olmaması üçün "Pambıqlı" su kanalına beton üzüklər çəkilir. Rayonda “Alabaşlı-1” və “Alabaşlı-2” nasos stansiyasıyalarının təmiri başa çatdırılıb və istifadəyə verilib. İdarənin balansında olan 925 kilometr kanallar və təsərrüfat daxili arxlar mütəmadi olaraq texnikalar vasitəsi ilə təmizlənir.
Ümumiyyətlə, Şəmkir rayonunda 40500 hektar suvarılan ərazi var ki, bununda 26800 hektarı Suvarma idarəsi tərəfindən suvarılır. Suvarma mənbəyi isə Şəmkirçay Su Anbarı, Zəyəm çay, Maşın kanal və 17 ədəd nasos stansiyalarının vasitəsi ilə reallaşdırılır.
Bahar fəsli əkinçilik üçün əlverişli fəsildir və bu səbəbdən fermerlərin əksəriyyəti öz təsərrüfatlarında məhsullarını artıq əkib-becərməyə başlayıblar. Bu sahədə suvarmada problemlərin yaranmaması istiqamətində də lazımi bütün işlər aparılır. Belə ki, maşın-mexanizmlə umümi olaraq 750 kilometr kanal lildən və kol-kosdan təmizlənib. Bir nasos stansiya tam əsaslı təmir olunub.
Şəmkir rayon Suvarma Sistemləri İdarəsinin rəisi Mirbəşir Ələsgərov görülən işlərdən danışarkən deyib: “Suvarmada su itkisinin qarşısının alınması üçün kanallara beton üzük çəkilir. Onlardan biri də idarənin balansında olan 3 kilometr uzunluğunda olan “Pambıqlı” kanalıdır. Hazırda kanalın 1,9 kilometri beton üzlüyə alınıb, 1,1 kilometrinin isə cari ildə beton üzlüyə alınması nəzərdə tutulur. Hazırda orada beton işləri davam etdirilir. “Pambıqlı” kanalı Əliyaqublu və Çaparlı kəndlərinin 360 hektar əkin sahələrinin itkisiz suvarılmasını təmin edəcəkdir”.
İstixana və bağ sahələrinin çoxluq təşkil etdiyi Şəmkir rayonunda fermerlər suya olan tələbatını əsasən suvarma kanallarından və nasos stansiyalarının ötürdüyü sulardan ödəyirlər. Fermerlər İlqar Əhmədov və Elxan Əliyev bu sahədə nə qış fəslində, nə də indiki gündə çətinliklər yaşamadığını bildirirlər. Onlar əvvəllər su itkisi olan kanallara beton üzlüklərin çəkilməsi ilə sahələrinin daha çox suvarılacağına və məhsuldarlığın da daha bol olacağına ümid etdiklərini deyirlər. Artıq bir çox fermer məhsulunu suvarıb.
Fermerlərin də bildirdiyi kimi, suvarmada çətinliklərin olmaması istiqamətində idarənin gördüyü tədbirlər ardıcıl davam etdirilir. Beton üzlüklərin çəkilməsi ilə yanaşı, kanalların təmizlənməsi də mühüm amildir. Hazırda Çinarlı kəndinə xidmət edən kanalın lildən təmizlənməsi işləri görülür.
Şəmkir rayon Suvarma Sistemləri İdarəsinin baş mühəndisi Bakir Allahyarov qeyd edib ki, idarənin balansında 35 kilometr kollektor drenaj şəbəkəsi də mövcuddur. Bu şəbəkə ötən il tam olaraq lildən və kol-kosdan təmizlənib. Kollektor drenaj şəbəkəsi 1500 hektar ərazinin suvarılmasına xidmət edir.
İdarənin balansında 11 ədəd I dərəcəli baş kanallar, 6 ədəd təsərrüfatlar arası II dərəcəli kanallar, 109 ədəd təsərrüfatlar daxili kanallar var. Kanalların ümumi uzunluğu 890,7 kilometrdir. Ondan baş kanallar 202,4 kilometr, təsərrüfatlararası kanallar 50,4 kilometr, daxili təsərrüfat kanallar 626,25 kilometr, kollektor-drenaj kanallar isə 28,2 kilometrdir.
Şəmkir Suvarma Sistemləri İdarəsinin balansında Göygöl və Morul su anbarı da mövcuddur. Göygöl anbarı Gədəbəy rayonunun ərazisində yerləşir, Ermənistanla həmsərhəddədir. Ona görə də, uzun müddətdir ki, həmin su anbarından suvarma məqsədi ilə istifadə etmək mümkün deyil. Anbarın su tutumu 5500 min kubmetr olmaqla, ərazisi 45 hektardır. Anbarın su buraxma qabiliyyəti 3 kubmetr/saniyədir.
Morul su anbarı isə Şəmkir şəhərinin ərazisində yerləşir. Anbarın su tutumu 80 min kubmetrdir. Anbarın ərazisi 3,5 hektar olmaqla, su buraxma qabiliyyəti 0,25 kubmetr/saniyədir.
Bölmənin digər xəbərləri
