Şabran, 29 mart, AZƏRTAC

Kənd təsərrüfatının inkişafı, ilk növbədə, suvarma suyundan asılıdır. Heç kimə sirr deyil ki, bol məhsuldarlıq əldə etmək üçün sahələrin vaxtında suvarılması vacib şərtdir. Məhz bu məqsədlə Şabranda suvarma mövsümünə ciddi hazırlıq işləri görülür.

Şabran Suvarma Sistemləri İdarəsindən AZƏRTAC-ın bölgə müxbirinə verilən məlumata görə, rayonda 27 min hektar əkinəyararlı torpağı suvarmaq üçün 764 kilometr uzunluğunda təsərrüfatdaxili və təsərrüfatlararası suvarma kanalından istifadə edilir. Sahələrin vaxtında və itkisiz suvarılmasını təmin etmək məqsədilə 100 kilometrdən artıq torpaq kanal beton kanalla əvəz olunub.

Vaxtilə torpaq olan, indi isə betonla əvəzlənən kanallardan biri də Ağalıq kanalıdır. Uzunluğu 2600 metr olan bu kanal 1000 hektar sahənin suvarılmasını təmin edir.

Hazırda rayonda beton kanalların yenilənməsi və təmiri davam etdirilir. Həmçinin sahələrin vaxtında suvarılmasını düzgün təşkil etmək məqsədilə su kanalları lil və kol-kosdan təmizlənir. Görülən işlər nəticəsində kanalların ötürücülük qabiliyyəti artırılır ki, bu da su itkisinin qarşısını alır. Kanalların təmizlənməsi işlərinə 12 ədəd ağır texnika cəlb olunub.

Rayonda xüsusən yay aylarında suvarma suyuna olan tələbatı ödəmək məqsədilə 3 ədəd subartezyan quyu da istifadəyə verilib.

Görülən tədbirlərin nəticəsidir ki, təsərrüfat sahibləri rahat şəkildə sahələri suvara bilirlər. Bu da öz növbəsində, fermerlərə bol məhsul əldə etməyə və sahələrini daha da genişləndirməyə şərait yaradır.

Qeyd edək ki, 2019-cu ildə aparılan meliorativ tədbirlərdən sonra Şabranda 9 min hektar sahə əkin dövriyyəsinə cəlb olunub. Əkinə yeni cəlb edilən sahələrin suvarılması üçün ərazidə yeni qapalı sistem yaradılıb.