Ağstafanın üzüm bağlarında yaz qulluq işləri görülür VİDEO











Ağstafa, 5 aprel, Ruslan Novruzoğlu, AZƏRTAC
Qərb bölgəsində üzüm bağlarında yaz qulluq işləri həyata keçirilir. Hələ qış aylarından başlanan quru budama yekunlaşıb. Sahələrdə təmizləmə və bərpa işləri görülür.
AZƏRRAC xəbər verir ki, qərb bölgəsində kənd təsərrüfatının prioritet sahələrindən biri də üzümçülükdür. Son illər bu sahəyə fermerlərin marağı artmaqdadır. Xaricdən yeni sort üzümlər gətirilir ki, bu da məhsuldarlığın artmasına xidmət edir.
Ağstafa rayonunda da üzümçülər sahələrdə yaz işlərini davam etdirirlər. Fermer Qurban Aslanovun 3 hektardan çox üzüm bağı var. Fermer bildirib ki, havaların yağıntılı keçməsi üzümçülük üçün olduqca əlverişlidir. Quru budama işlərindən sonra üzüm bağlarında dirəklərin yenilənməsi və təmiri, tənək budaqlarını saxlayan məftillərin dəyişdirilməsi işləri görülür.
Üzümçülər deyirlər ki, üzüm bağında ilin on iki ayı iş var. “Budama işlərini yekunlaşdırmışıq. İndi təmizlənmə işləri görülür. Ondan sonra ardıcıllıqla dirəklər düzəldiləcək, torpaq yumşaldılacaq”, - deyə fermer Q.Aslanov əlavə edib.
Vaxtında lazımi dərmanlama işləri də həyata keçirilib. Ziyanvericilərə qarşı görülən işlər məhsuldarlığa müsbət təsir göstərir.
Ağstafa rayon Dövlət Aqrar İnkişaf Mərkəzinin (DAİM) bitkiçilik sektorunun rəhbəri Çingiz Məmmədov bildirib ki, Ağstafa rayonunda 490 hektar sahədə üzüm bağları var. Onlardan 480 hektarı məhsul verən, 10 hektarı isə yeni salınan bağlardır.
Sahələrdə texniki və süfrə üzüm sortları becərilir. İlbəil üzüm növlərini də artıran fermerlər gələcəkdə bağların sahələrini bir qədər də genişləndirməyi planlaşdırırlar.