Su itkisinin qarşısının alınması üçün torpaq kanallar beton üzlüyə alınır VİDEO
Zaqatala, 7 aprel, Mustafa Dadaşov, AZƏRTAC
“Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın həyata keçirilməsi üzrə tədbirlər planında torpaqların su təminatının yaxşılaşdırılması üçün meliorasiya-irriqasiya işlərinin həyata keçirilməsinin davam etdirilməsi əsas istiqamətlərdən biri kimi nəzərdə tutulub.
Azərbaycan Respublikası Prezidentinin müvafiq Sərəncamı ilə təsdiq edilmiş “Su ehtiyatlarından səmərəli istifadənin təmin edilməsinə dair 2020-2022-ci illər üçün Tədbirlər Planı”nda ölkədə su ehtiyatlarının artırılması, istehlakçıların içməli su və suvarma suyu ilə təchizatının yaxşılaşdırılması məqsədilə aidiyyəti dövlət qurumlarının qarşısına mühüm vəzifələr qoyulub.
Torpaqların su təminatının yaxşılaşdırılması, əkin sahələrinin suvarılması zamanı su itkisinin qarşısının alınması məqsədilə son illər “Meliorasiya və Su Təsərrüfatı” ASC-nin Zaqatala rayon Suvarma Sistemləri İdarəsi tərəfindən də zəruri tədbirlər həyata keçirilir.
İdarənin suvarma şöbəsinin müdiri Abdulla Qədirov AZƏRTAC-ın bölgə müxbirinə bildirib ki, hazırda Zaqatala rayonunda 15 min 562 hektar suvarılan torpaq sahəsi var. Əkin sahələrini suvarma suyu ilə təmin etmək üçün rayonda 563 kilometr uzunluğunda suvarma kanalları mövcuddur. Bu kanalların 438 kilometri açıq torpaq məcralı, 18,7 kilometri beton üzlüklü kanallar, qalanı isə boru kəmərləridir. 2020-ci ildə əkin sahələrinin suvarılması üçün bu kanallar vasitəsilə 60 milyon kubmetr suyun verilməsi təmin edilib. Kanallar vasitəsilə verilən su ilə 46 min 390 hektar əkin sahəsi suvarılıb.
Mütəxəssisin sözlərinə görə, əkin sahələrinin suvarılmasını təmin edən torpaq kanallarda su itkisinin qarşısının alınması məqsədilə ötən il idarə tərəfindən kanalların beton üzlüyə alınması istiqamətində işlər davam etdirilib. Belə ki, rayonun Yuxarı Tala və Aşağı Tala kəndlərinin ərazisindəki həyətyanı və əkin sahələrinin suvarılmasını təmin edən 4,8 kilometr uzunluğunda Qobuçay torpaq kanalın 2,1 kilometrlik hissəsi ötən il beton üzlüyə alınıb. Hazırda kanalın suburaxma gücü saniyədə 0,5 kubmetr təşkil edir. Kanalın beton üzlüyə alınması ilə bağlı işlər cari ildə də davam etdiriləcək. Eyni zamanda, bu il uzunluğu 8 kilometr olan Qandax suvarma kanalının da beton üzlüyə alınması işlərinə başlanılması nəzərdə tutulur.
Dövlətimizin başçısının birbaşa nəzarəti ilə ölkə ərazisində meliorasiya və su təsərrüfatı sahəsində görülən işlər fermerlərin də ürəyincədir. Zaqatala rayonunun Qımır kəndindən olan fermer Qəhrəman Məmmədov uzun illərdir ki, tütünçülüklə məşğul olur, qarğıdalı əkib becərir. Fermer ötən il 5 hektar sahədə tütün, 2 hektarda isə dən üçün qarğıdalı əkib. Təsərrüfat sahibi tütün sahəsinin hər hektarından 16 ton yaşıl kütlə əldə edib, qarğıdalı sahəsinin hər hektarının məhsuldarlığı isə 90 sentner olub.
Fermerin sözlərinə görə, bol məhsul götürməyinin əsas səbəbi suvarma işlərinin vaxtlı-vaxtında aparılması olub. Suvarma dövründə heç bir çətinliklə üzləşməyib, əkin sahələrinə lazımi qədər su verməyə nail olub. Bundan ruhlanan fermer cari təsərrüfat ilində tütün əkini sahəsini artıraraq 12 hektara, qarğıdalı sahəsini isə 4 hektara çatdırmağı qarşıya məqsəd qoyub. “Ümid edirəm ki, bu il də suvarmada heç bir çətinliklə üzləşməyəcəyəm, son nəticədə bol məhsul götürəcəyəm”,- deyə təsərrüfat sahibi əlavə edib.
Bölmənin digər xəbərləri
