Təhsil naziri: Azərbaycan ortaq türk tarixi dərsliyini məktəblərində tədris edən ilk türkdilli dövlətlərin arasındadır VİDEO
İstanbul, 4 noyabr, AZƏRTAC
Hazırda iştirak etdiyimiz Türk Şurasının altıncı toplantısı əsasən türkdilli dövlətlərin təhsil sahəsi üzrə əməkdaşlıq platforması rolunu oynayır və burada da bir neçə məsələ öz əksini tapır. İlk növbədə, onu qeyd etmək istərdim ki, artıq ötən ildən başlayaraq Azərbaycan ortaq türk tarixi dərsliyini məktəblərində tədris edən ilk türkdilli dövlətlərin arasındadır. Hələlik bu dərslik pilot layihə səviyyəsindədir. Oxşar formada ortaq türk coğrafiyası və ədəbiyyatı dərslikləri də hazırlanır.
AZƏRTAC xəbər verir ki, bu fikirləri Azərbaycan Respublikasının təhsil naziri Emin Əmrullayev İstanbulda media nümayəndələrinə açıqlamasında bildirib.
Tədbirin mahiyyəti haqqında danışan nazir burada bir istiqamət olaraq tədrisin məzmunu ilə bağlı verilən müəyyən qərarların icrası, eyni zamanda, universitetlərarası əməkdaşlığın daha da genişləndirilməsi məsələlərinin müzakirə olunduğunu bildirib: “Azərbaycan Dövlət İqtisad Universiteti türk universitetləri birliyinin üzvü seçilib. Biz gələcəkdə təbii ki, bu sayın artırılmasını istəyirik. Burada, eyni zamanda, həm müəllim-professor heyəti, həm də tələbələr arasında mübadilə proqramları müzakirə olunur. İnanıram ki, bu proqramların sayı artacaq. Tədbirdə, həmçinin Azərbaycanın Vətən müharibəsində qazandığı Zəfərin fonunda çox böyük sevinc ifadələri var və bu hadisə bütün türk dünyasının tarixi Qələbəsi kimi qeyd edilir. Bu anlamda biz çox istərdik ki, məktəblilərin məhz Azərbaycanın işğaldan azad edilmiş torpaqlarına səfərləri olsun. Bu səfərlərdə təbii ki, həm təhsil sahəsində, həm də digər sahələrdə müəyyən mübadilə proqramları həyata keçirilsin. Tədbirdə bu məsələlərlə bağlı fikir mübadiləsi aparılır. Fərqli dövlətlərin təhsil nazirləri ilə görüşlərimiz də keçirilir. Bu isə daha çox ikitərəfli əməkdaşlıqların genişləndirilməsini nəzərdə tutur".
Azərbaycanın işğaldan azad edilən bölgələrində aparılan bərpa-yenidənqurma işləri haqqında danışan nazir deyib: "Hazırda Şuşada ölkə başçımızın müvafiq Sərəncamı ilə Təhsil Nazirliyi tərəfindən 1 nömrəli məktəbin inşası davam edir. Digər təhsil müəssisələrinin də tikintisi planlaşdırılır. Hazırda bildiyiniz kimi, daha çox infrastrukturun bərpası ilə bağlı layihələrin icrası nəzərdə tutulur. Ümumiyyətlə, Şuşa şəhərində olan təhsil müəssisələri ilə bağlı biz kompleks yanaşmanın tərəfdarıyıq. Çünki Şuşa Azərbaycanın mədəniyyət paytaxtı elan edilib. Bu anlamda Şuşada müxtəlif musiqi, incəsənət məktəblərinin də tikintisi nəzərdə tutulur. Təbii ki, bu, şəhərin baş planına uyğun olaraq aparılan planlaşdırma prosesidir. Hazırda müəyyən işlər gedir".
İki qardaş ölkə arasında təhsil mübadilələri məsələlərinə də toxunan nazir Türkiyə-Azərbaycan Ortaq Universitetinin yaradılması ilə bağlı müzakirələrin aparıldığını qeyd edib: "Səfər zamanı bununla bağlı Türkiyə universitetləri ilə fikir mübadiləsi aparmaq imkanımız oldu. Birgə proqramlar, ikili diplom proqramları da müzakirə mövzusudur. Artıq Türkiyənin Egey Universiteti ilə Azərbaycan Dövlət Aqrar Universiteti arasında müvafiq dövlət proqramı çərçivəsində bu ildən etibarən ikili proqram başlayır. Bu ikili diplom hüquqi nöqteyi-nəzərdən diplomun hər iki ölkədə tanınması baxımından çox vacibdir. İlk dəfədir ki, belə bir təcrübə tam hüquqi çərçivədə öz həllini tapıb. Müzakirələrdə belə diplom proqramlarının digər sahələr üzrə də tətbiqinin tərəfdarı olduğumuzu bildirdik. Bu, tibb, mühəndislik və digər sahələri əhatə edir. Ümidvaram ki, bu dialoq davam edəcək və yaxın zamanda universitetlərarası birgə əməkdaşlıq layihələrinin də sayı artırılacaq".
Ölkəmizdə tətbiq ediləcək təhsil kreditləri haqqında məlumat verən E.Əmrullayev deyib: "Təhsil kreditlərinin verilməsi bir hazırlıq prosesi tələb edirdi. Bu proses demək olar ki, artıq bitib. Yəqin ki, növbəti həftələrdə elan ediləcək. Tələbə Kredit Fondunun müşahidə şurasının ilk iclası keçirilib və müəyyən qərarlar qəbul edilib. Bu qərarlar təsdiqini tapdıqdan sonra yaxın günlərdə artıq tələbələrə ilk kreditlərin verilməsi ilə bağlı proses başlayacaq. Bu kreditlərin iki paket üzərindən verilməsi nəzərdə tutulur. Bunlar "standart" və "sosial" paketlərdir. “Sosial” paket müəyyən mənada əlillik, hər iki valideynin işsiz və ya təqaüdçü olması və bu kimi müxtəlif kriteriyalar əsasında veriləcək. Digər tələbələrə isə kreditlərin artıq elektron qaydada müraciət əsasında dövlət vəsaitinə uyğun olaraq verilməsi planlaşdırılır. İlk mərhələdə 40 mindən artıq tələbəyə kreditlərin verilməsi üçün imkanımız var. Kredit platforması işə düşdükdən sonra isə universitetlərdə bununla bağlı geniş təbliğat-təşviqat işləri aparılacaq".
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
