“1 Avqust – Azərbaycan Əlifbası və Azərbaycan Dili Günüdür” - tədbir
Bakı, 1 avqust, AZƏRTAC
Azərbaycan Respublikasının Dövlət Dil Komissiyası yanında Monitorinq Mərkəzinin təşkilatçılığı ilə “Heydər Əliyev İli” çərçivəsində Şuşa şəhərində “1 Avqust - Azərbaycan Əlifbası və Azərbaycan Dili Günüdür” adlı tədbir keçirilib.
Bu barədə AZƏRTAC-a Monitorinq Mərkəzindən məlumat verilib. Bildirilib ki, tədbiri Monitorinq Mərkəzinin direktoru professor Sevinc Əliyeva açaraq doğma dilimizlə bağlı tədbirin Azərbaycanın mədəniyyət paytaxtı Şuşa şəhərində keçirilməsindən böyük məmnunluq hissi duyduğunu, müstəqil və qalib dövlətimizin atributlarından biri - Azərbaycan dili haqqında məhz Şuşa şəhərində danışmağın şərəfli və qürurverici olduğunu söyləyib. S.Əliyeva Qarabağın incisi Şuşada Azərbaycan dili ilə bağlı ilk tədbirin keçirilməsini təmin edən, 44 günlük Vətən müharibəsinin Qələbəsini Şuşa Zəfəri ilə taclandıran Azərbaycan Respublikasının Prezidenti, Ali Baş Komandan İlham Əliyevə və rəşadətli Azərbaycan Ordusuna dərin minnətdarlıq hissini ifadə edib. Bəşər mədəniyyətinin tərkib hissəsi olan dili mədəni dəyərlərin ötürülməsi, qorunması və qavranılmasında mühüm amil kimi səciyyələndirən Sevinc Əliyeva ana dilini və əlifbanı millətin siması, onun milli sərvəti və varlığının təsdiqi adlandırıb. Dövlətimizin ictimai-siyasi həyatında və yazı mədəniyyəti tarixində mühüm hadisə olan latın qrafikalı Azərbaycan əlifbasına keçidin tam təmin edilməsində, ana dilinin milli dövlətçiliyimizin əsas atributu kimi özünü təsdiq etməsi və qorunmasında, eləcə də dil siyasətinin formalaşdırılmasında Ulu Öndər Heydər Əliyevin müstəsna xidmətlərindən danışan professor millətin dilinin dövlət dili statusuna yüksəlməsini xalqın dövlət qurmaq və qorumaq qüdrətinin, eyni zamanda, dilin zənginliyinin sübutu kimi qiymətləndirib. Qeyd edib ki, dövlətçilik tariximizə Heydər Əliyev dövrü kimi daxil olan 1969-2003-cü illərdə Azərbaycan dilinin hərtərəfli inkişafı yalnız rəsmi sənədlərdə deyil, əməli fəaliyyətdə də öz əksini tapıb, Ulu Öndər tərəfindən imzalanan sərəncam və fərmanlar ölkəmizdə dil siyasətinin mükəmməl konsepsiyasını, uzunmüddətli strategiyasını müəyyən edib.
S.Əliyeva əlavə edib ki, Monitorinq Mərkəzi bu fərman və sərəncamlardan irəli gələn məsələləri, dövlət dili ilə bağlı Ulu Öndərin göstərişlərini rəhbər tutaraq doğma dilin saflığının qorunmasına, azərbaycançılıq ideologiyasının təbliğinə öz töhfələrini verməkdədir.
“Azərbaycan əlifbasının dünəni və bu günü” mövzusunda məruzə edən Mərkəzin direktor müavini dosent Gülarə Əmirova bəşəriyyətin ən böyük kəşflərindən sayılan yazının insan cəmiyyətinin inkişafında, mədəniyyətinin formalaşmasındakı mühüm rolunu qeyd etməklə onun ifadə vasitəsi olan əlifbanın çox qədim tarixi olduğunu vurğulayıb. O bildirib ki, Azərbaycan xalqı müxtəlif dövrlərdə ictimai, siyasi və digər səbəblər üzündən bir sıra əlifba sistemlərindən istifadə etməli olub. Əlifba islahatları ilə bağlı xalqımızın maarifpərvər ziyalılarının apardığı mübarizədən söz açan məruzəçi müstəqilliyimiz əldə olunduqdan sonra latın qrafikalı Azərbaycan əlifbasının bərpasını Türk dünyasının birləşdirilməsi istiqamətində mühüm addım kimi dəyərləndirib. Azərbaycan dilinin inkişafında və saflığının qorunmasında Ümummilli Liderin müstəsna xidmətlərini vurğulayan G.Əmirova Ulu Öndərin “Azərbaycan Əlifbası və Azərbaycan Dili Gününün təsis edilməsi haqqında” Fərmanının ölkənin ictimai-siyasi həyatında mühüm hadisə olduğunu və latın qrafikalı Azərbaycan əlifbasına keçidi bütövlükdə təmin etdiyini qeyd edib.
“Təhsildə Azərbaycan dili” adlı məruzə ilə çıxış edən filologiya üzrə fəlsəfə doktoru Aynur Paşayeva bildirib ki, müstəqilliyin bərpasından sonra elm və təhsil problemləri ümumi inkişaf və dövlət siyasəti ilə vəhdət təşkil edib, Ulu Öndərin həyata keçirdiyi hər bir islahatın əsasında isə məhz milli təəssübkeşlik, milli-mənəvi dəyərlərə ehtiram dayanıb. O, ölkəmizdə dünyəvi təhsilə inteqrasiyaya hesablanmış köklü islahatlardan danışıb, təhsil və dil məsələlərinin vəhdətinin dövlətimiz üçün hər zaman prioritet məsələ olduğunu vurğulayıb.
Tədbirdə Bakı Mühəndislik Universitetinin tədris məsləhətçisi, dosent Zabitə Teymurlu, Azərbaycan Dövlət Mədəniyyət və İncəsənət Universitetinin dosenti, Əməkdar incəsənət xadimi Fəxriyyə Xələfova, Bakı Avrasiya Universitetinin Ümumi filologiya kafedrasının baş müəllimi filologiya üzrə fəlsəfə doktoru Zəminə Rüstəmbəyli, Əməkdar jurnalist Mətanət Ağamirli, Laçın şəhər 1 nömrəli tam orta məktəbin direktoru Vəfa İsmayılova, “Art Mood” reklam şirkətinin təsisçi-direktoru Xəyalə Mütəllimova, “Diksiya Akademiyası” MMC-nin rəhbəri Cəlalə Nəzəroğlu, “Maestro School” proqramlaşdırma məktəbinin təsisçisi Mədinə Paşayeva və digər çıxış edənlər Ümummilli Liderin Vətən sevgisindən, ana dilinə qayğısından danışaraq dilin saflığını qorumaq, onunla fəxr etmək, ana dilini xalqın mənəvi varlığı kimi sevməkdə Heydər Əliyevin hər bir azərbaycanlıya örnək olduğunu bildiriblər. Azərbaycan dilinin hərtərəfli inkişafı və beynəlxalq nüfuzunun yüksəldilməsi dövlətçilik tarixinin ən mühüm nailiyyəti və məqsədyönlü siyasətin məntiqi nəticəsi kimi dəyərləndirilib.
Çıxış edənlər bütün sahələrdə ana dilinin saflığının qorunmasının vacibliyini vurğulamaqla İKT, reklam, tibb və digər sferalarda da dilin düzgün tətbiqi məsələlərinə həssas yanaşmağın zəruriliyini ifadə ediblər.
Tədbir çərçivəsində müasir dövlətçiliyimizin banisi Heydər Əliyevin Azərbaycan sevgisi, doğma dillə bağlı təəssübkeşliyini əks etdirən videoçarxlar, Xurşidbanu Natəvanın 190 illiyinə həsr olunan film, eləcə də digər videomateriallar nümayiş etdirilib.
Bölmənin digər xəbərləri
