Nazir müavini: Bakıda keçirilən “TEKNOFEST”i 300 mindən çox insan ziyarət edib VİDEO
İstanbul, 30 avqust, AZƏRTAC
Məlum olduğu kimi, bu il Türkiyədə “TEKNOFEST” beşinci dəfə keçirilir. Bu, dünyanın ən böyük texnologiya festivalıdır ki, qardaş ölkə bu tədbirə ev sahibliyi edir. “TEKNOFEST”də bu il bir ilkə də imza atılıb. Bu il festival ilk dəfə olaraq Türkiyə sərhədlərindən kənara çıxaraq məhz Azərbaycanda keçirildi. Bu ilin may ayının 26-29-u tarixləri arasında Bakıda keçirilən “TEKNOFEST”i 300 mindən çox insan ziyarət edib. Bu, regionun ən böyük festivalı idi.
AZƏRTAC xəbər verir ki, bu fikirləri Türkiyədə keçirilən “TEKNOFEST-2022 Qara Dəniz”də iştirak edən rəqəmsal inkişaf və nəqliyyat nazirinin müavini Rövşən Rüstəmov Azərbaycan mediasına müsahibəsində deyib.
Ölkəmizin “TEKNOFEST-2022 Qara Dəniz”də fəal iştirak etdiyini deyən nazir müavini bildirib ki, bu, bizim Türkiyədə keçirilən “TEKNOFEST”lərdə ikinci iştirakımızdır. Ötən il ölkəmiz İstanbulda keçirilən festivalda aktiv iştirak edib. Türkiyədə keçirilən builki festivalda “TEKNOFEST Azərbaycan”ın qalibi olan komandalar da iştirak edir. Biz burada həmin komandaların nəticələrini görə bilərik. Eyni zamanda, burada quraşdırılan texniki avadanlıqlardan istifadə edərək ziyarətçilər “TEKNOFEST Azərbaycan”a virtual tur da edə bilərlər. Bundan əlavə builki “TEKNOFEST”də “TEKNOFEST Azərbaycan”ın bir çox startapları da iştirak edir. Bu startaplar öz innovativ həllərini həm Türkiyədən olan ziyarətçilərə, həm də dünyanın 100-dən artıq ölkəsindən tədbirə qatılan ziyarətçilərə təqdim edirlər.
Rövşən Rüstəmov deyib: “Bizim üçün bu “TEKNOFEST”ə qatılmanın digər əhəmiyyəti də ondan ibarətdir ki, biz “TEKNOFEST Azərbaycan” çərçivəsində “Smart Qarabağ” Hakatonunu keçirmişdik və həmin hakatonunun qalibləri buradadırlar. Onlar buradakı ziyarətçilərə bizim qurmaq istədiyimiz yaşıl Qarabağ, ağıllı kəndlərlə bağlı layihələri təqdim edirlər. Buradakı ziyarətçilər müxtəlif artırılmış reallıqlardan istifadə edərək Qarabağa, Qarabağın cənnət guşəsi olan Şuşaya virtual tur edə bilərlər”.
Qeyd edilib ki, Azərbaycanda keçirilən “TEKNOFEST”də bir ilk həm də o idi ki, Türkiyənin ağıllı hava texnikası olan “Bayraktar AKINCI” TİHA-pilotsuz döyüş aparatı Vətənimizdə nümayiş olunurdu. Bu, “AKINCI”-nın Türkiyə hüdudlarından kənarda ilk nümayişi idi. Bu “TEKNOFEST”də isə biz Döyüş Pilotsuz Təyyarə Sistemi (MİUS) “Qızıl alma”nı görürük. “Qızıl alma” “Baykar” şirkətinin istehsal etdiyi ən son texnoloji yeniliklərlə təmin olunmuş hava gəmisidir. Ümid edirik ki, qardaş Türkiyənin yaratdığı bu texnologiyalar, əldə etdiyi nailiyyətlər daha sonrakı illərdə digər ölkələrdə birgə gücümüzlə istifadəyə imkan verəcək.
Günel Məlikova
AZƏRTAC-ın xüsusi müxbiri
İstanbul
Bölmənin digər xəbərləri
