Moskvanın “Metrovaqonmaş” zavodunda Heydər Əliyevin 100 illiyinə həsr olunmuş təntənəli tədbir keçirilib VİDEO
Bakı, 19 aprel, AZƏRTAC
Moskvanın məşhur “Metrovaqonmaş” zavodunda Azərbaycan xalqının Ümummilli Lideri Heydər Əliyevin anadan olmasının 100 illiyinə həsr olunmuş təntənəli tədbir keçirilib.
AZƏRTAC xəbər verir ki, bir vaxtlar Heydər Əliyevin sərəncamı əsasında bu zavod xeyli genişləndirilib, yeni istehsal sexləri tikilib, Ulu Öndər şəxsən onların açılışında iştirak edib. Bu hadisəni əbədiləşdirmək üçün 2019-cu ilin oktyabrında burada memorial lövhə qoyulub. Bu gün sözügedən xatirə lövhəsinin önündə zavod kollektivi, köhnə nəslin nümayəndələri və gənclər toplaşıblar.
Kollektivin qarşısında çıxış edən Polad Bülbüloğlu qeyd edib ki, Azərbaycan Respublikasının Rusiya Federasiyasında səfiri, Heydər Əliyevi yaxşı tanıyan və onun komandasında 10 il ərzində mədəniyyət naziri olmuş insan kimi böyük liderin 100 illiyi münasibətilə keçirilən tədbirdə sevinclə iştirak edir. Səfir vurğulayıb ki, Heydər Əliyevlə çalışdığı illər böyük məktəbdir, həmin dövr onun yaddaşına əbədi olaraq həkk olunub.
Diplomat xatırladıb ki, Heydər Əliyev Moskvada SSRİ Nazirlər Sovetinin birinci müavini işləyib və 30-dan çox nazirliyin kurasiyası onun səlahiyyətinə daxil olub. Buraya BAM-ın tikintisi, kənd təsərrüfatının və sənayenin inkişafı üzrə müxtəlif proqramlar da aiddir. Heydər Əliyev ölkənin inkişafı və insanların rifahı naminə əlindən gələni əsirgəməyən insanlardan idi.
Polad Bülbüloğlu vurğulayıb ki, Azərbaycanın həm iqtisadi, həm də siyasi cəhətdən ağır vəziyyətdə olduğu bir dövrdə xalq Heydər Əliyevin Bakıya qayıtmasını və respublikaya rəhbərlik etməsini tələb edib, çünki onsuz hər şey fəlakətlə nəticələnə bilərdi.
Çox qısa müddət ərzində öz nüfuzu və həyat təcrübəsi, insanları dinləmək bacarığı, ümumi dil tapmaq səriştəsi, ən ciddi problemləri həll etmək qabiliyyəti nəticəsində o, qayda-qanun yarada bildi. Azərbaycan iqtisadi inkişaf və öz rifahının yaxşılaşdırılması yoluna qədəm qoydu. “Əsrin müqaviləsi” imzalandı, bu sənəd respublikaya maliyyə vəsaitlərinin axınını təmin etdi, quruculuq və inkişaf prosesi başlandı. Xalqımız müasir Azərbaycanın memarı olan bu görkəmli dövlət xadiminə, böyük insana minnətdardır.
Azərbaycanın səfiri çıxışının sonunda holdinqin və zavodun rəhbərliyinə təntənəli tədbirin təşkilinə görə təşəkkürünü bildirib, müəssisənin kollektivinə uğurlar və əmin-amanlıq arzulayıb.
Tədbirdə “Metrovaqonmaş” SC-nin baş direktoru Andrey Stepanov çıxış edib. O xatırladıb ki, Azərbaycan Respublikası Prezidentinin sərəncamına uyğun olaraq 2023-cü il Azərbaycanda “Heydər Əliyev İli” elan olunub. Baş direktor qeyd edib ki, Heydər Əliyev SSRİ Nazirlər Soveti sədrinin birinci müavini vəzifəsində sənayeni kurasiya edirdi və öz fəaliyyəti çərçivəsində sovet və indiki Rusiya sənayesi üçün çox böyük işlər görüb. “O, özündən sonra çoxlu obyektlər və işlər qoyub gedib. Onların arasında 1967-ci ildən bəri həyata keçirilən Bakıya metro vaqonlarının tədarükü də var. Bu dövr ərzində Azərbaycana 400-dən çox metro vaqonu göndərilib”, -deyə A.Stepanov bildirib.
Sonra Azərbaycan xalqının Ümummilli Liderinin xatirə lövhəsinin önünə çiçək səbətləri qoyulub, xalqımızın böyük oğlunun ünvanına çoxlu xoş sözlər söylənilib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
