28 May yüzillər boyu sönməyən bir ocağın alovlandığı gündür ŞƏRH
Bakı, 28 may, AZƏRTAC
28 May – Azərbaycan tarixində yalnız bir təqvim günü deyil. Bu gün, millət olaraq bizim azadlıq iradəmizin, milli kimliyimizin və dövlətçilik şüurumuzun bərqərar olduğu, yüzillər boyu sönməyən bir ocağın alovlandığı gündür. 1918-ci il mayın 28-də elan olunan Azərbaycan Xalq Cümhuriyyəti ilə xalqımız təkcə siyasi müstəqillik əldə etmədi – həm də demokratik, hüquqi və dünyəvi dövlət quruculuğuna başladığını dünyaya nümayiş etdirdi.
Azərbaycan Xalq Cümhuriyyəti öz dövrü üçün fövqəladə dərəcədə irəliyə dönük bir dövlət modeli idi. Bu Cümhuriyyət yalnız coğrafi sərhədlər çərçivəsində deyil, mənəvi və siyasi anlamda da Şərqin ilk demokratik dövləti kimi tarixə düşdü. Cəmi 23 aylıq fəaliyyəti ərzində qəbul edilən qərarlar, həyata keçirilən islahatlar və təsis olunan institutlar Azərbaycanın gələcək müstəqil dövlətçilik yolunun təməl daşlarını təşkil etdi.
Bunu AZƏRTAC-a açıqlamasında Milli Məclisin deputatı Müşfiq Məmmədli deyib.
O qeyd edib ki, 1918-ci ildə yaradılan Azərbaycan Xalq Cümhuriyyəti çox qısa müddətdə dövlətin mühüm sütunlarını formalaşdırdı. Parlamentin yaradılması, dövlət atributlarının - bayraq, gerb və himnin təsdiqi, Azərbaycan dilinin rəsmi dil elan edilməsi, qadınlara səsvermə hüququnun verilməsi kimi addımlar yalnız ölkə daxilində deyil, beynəlxalq müstəvidə də ciddi rezonans doğurdu. Qərb demokratiyasının əsas prinsipləri ilə Şərq düşüncə tərzini birləşdirən bu idarəetmə modeli xalqın milli mənsubiyyətini, kimliyini və hüquqlarını təmin edən mühüm bir platforma yaratdı. Bu dövr, həmçinin milli təhsil sisteminin, ordu və təhlükəsizlik strukturunun əsaslarının qoyulması ilə yadda qaldı. Qısa müddətdə Azərbaycan siyasi mədəniyyətin, vətəndaş bərabərliyinin və milli həmrəyliyin nümunəsini ortaya qoydu.
Bu şanlı tarixin 1920-ci ilin aprelində dayandırıldığnı təəssüflə qeyd edən deputat deyib: “Sovet işğalı nəticəsində xalqımız azadlığını yenidən itirdi, lakin azadlıq ideyası, Cümhuriyyətin qoyduğu irs xalqın yaddaşından heç vaxt silinmədi. Sovet dönəminin ən çətin zamanlarında belə bu ideyalar gizli şəkildə yaşadıldı və nəhayət, 1991-ci ildə müstəqilliyimiz yenidən bərpa olundu. Azərbaycan Respublikasının dövlət müstəqilliyi haqqında Konstitusiya Aktının qəbul olunması, bu irsin yenidən reallığa çevrilməsi demək idi. Amma müstəqil dövlət qurmaq heç də asan məsələ deyildi. Daxili çəkişmələr, xarici təzyiqlər və işğal siyasəti ölkəmizi dağılma təhlükəsi ilə üz-üzə qoymuşdu. Məhz belə bir taleyüklü anda xalqımızın böyük oğlu, Ulu Öndər Heydər Əliyev siyasi hakimiyyətə qayıdaraq Azərbaycanın müstəqil gələcəyini təmin etdi. O, dövlət quruculuğuna sistemli yanaşması, uzaqgörənliyi və siyasi qətiyyəti ilə ölkəmizi sabitliyə, iqtisadi dirçəlişə və beynəlxalq nüfuza qovuşdurdu. Ulu Öndərin dəfələrlə vurğuladığı kimi, Azərbaycan Xalq Cümhuriyyəti xalqımızın tarixində qızıl hərflərlə yazılmış bir dövrdür və biz bu dövlətin siyasi varisiyik”.
M.Məmmədli bildirib ki, bu gün Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə ölkəmiz Azərbaycan Xalq Cümhuriyyətinin ideyalarını yeni mərhələyə uğurla daşıyır. 2020-ci ilin 44 günlük Vətən müharibəsində qazanılan möhtəşəm Qələbə, 2023-cü ilin sentyabrında keçirilən antiterror əməliyyatı ilə suverenliyin tam bərpası – bunların hər biri müstəqil dövlətimizin gücünün və siyasi iradəsinin göstəricisidir. Azərbaycanın ərazi bütövlüyünün təmin olunması, Qarabağda həyata keçirilən bərpa və quruculuq işləri, tarixi torpaqlarda həyatın yenidən canlandırılması Cümhuriyyət qurucularının ruhunu sevindirən faktlardır. Bugünkü Azərbaycan dövlətçiliyi, onun siyasi və iqtisadi gücü, beynəlxalq nüfuzu Cümhuriyyətin qoyduğu ideya bazasının inkişafı nəticəsində əldə olunmuş uğurlardır.
“28 May tariximizin yalnız bir parçası deyil, bu, həm də gələcək nəsillərə daşımalı olduğumuz mənəvi və siyasi mirasdır. Azərbaycan Xalq Cümhuriyyəti bizi biz edən dəyərlərin, birlik və iradənin simvoludur. Biz bu irsə sahib çıxmalı, onu yaşatmalı və gələcək nəsillərə ötürməliyik. Çünki bu gün müstəqil, güclü və qalib Azərbaycan varsa, bu, həm 1918-ci il mayın 28-də atılan addımın, həm də o ideallara sadiqliyin nəticəsidir”, - deyə deputat vurğulayıb.
Bölmənin digər xəbərləri
