300 bal toplayan şagirdlər: Uğura aparan yol, inam və zəhmət VİDEO
Qəbələ-Şəki, 11 aprel, AZƏRTAC
Dövlət İmtahan Mərkəzi martın 2-də keçirilən buraxılış imtahanlarının nəticələrini açıqlayıb. Ölkə üzrə 23 şagird maksimum nəticə - 300 bal toplayaraq öz bilik və zəhmətinin bəhrəsini görüb. Ən yüksək göstərici isə Şəki-Zaqatala Regional Təhsil İdarəsinin payına düşür. Bu bölgənin 3 istedadlı gənci - 2-si Şəkidən, 1-i isə Qəbələdən bu uğura imza atıb.
AZƏRTAC-ın bölgə müxbiri bu qalib şagirdlərlə görüşüb, onların sevincinə şərik olub, gələcək planları ilə maraqlanıb.
Havanın soyuq və yağışlı olmasına baxmayaraq, Qəbələnin Uludaş kənd tam orta məktəbində bu gün ab-hava tam fərqlidir. Məktəbin tarixində ilk dəfə bir şagird – Ömər Rəsulov 300 bal toplayaraq bütün məktəbin fəxrinə çevrilib. Artıq məktəbdə bayram əhvali-ruhiyyəsi hökm sürür.
Səhər saatlarında müəllim və şagirdlər Öməri sürprizlə qarşılayıblar. O, sinfə daxil olan kimi alqışlarla qarşılanıb. Məktəbin direktoru Sadəddin Eldarov bu nəticəni digər şagirdlərə nümunə göstərir, bildirir ki, Ömər kimi səy göstərən hər bir gənc bu uğura çata bilər.
Atası usta, anası evdar qadın olan Ömər gələcəyini informasiya təhlükəsizliyi sahəsində görür. ADA Universitetində və ya Bakı Ali Neft Məktəbində ingilis dili üzrə təhsil almaq istəyən gənc deyir: “Bu uğur təkcə mənim deyil, Uludaşın, Qəbələnin və mənə dəstək olan hər kəsindir. Qarşıda daha bir imtahan var və mən ona da səylə hazırlaşıram”.
Səfərimizin növbəti ünvanı Şəkinin Orta Zəyzid kəndidir. Burada yerləşən 1 nömrəli tam orta məktəbdə də bu gün sevinc yaşanır. 215 şagirdin təhsil aldığı məktəbdə 300 bal toplayan Orxan müəllimləri və rəhbərlik tərəfindən xüsusi olaraq qarşılanır.
Orxan hələ 7-ci sinifdə oxuyarkən Respublika Fənn Olimpiadasında fizika fənnindən gümüş medal qazanıb. Baba-nənəsi, bibiləri və anası müəllim olan Orxan bu uğuru təsadüfi saymır. Hədəfi tibb sahəsində təhsil almaq və xalqına xidmət etməkdir.
“Valideynlərimə, müəllimlərimə, üzərimdə əməyi olan hər kəsə təşəkkür edirəm. Gələcəkdə dünya təcrübəsini öyrənib rayona qayıtmaq və burada insanlara xidmət etmək istəyirəm”, – deyə o bildirir.
Şəki şəhər Kimya-biologiya təmayüllü respublika liseyində isə 7-ci sinifdən təhsil alan Məhəmməd İsmayılov bu il buraxılış imtahanında maksimum nəticə göstərib. Kimya və biologiyaya xüsusi marağı olan Məhəmməd mühəndis olmaq istəyir. Artıq “Proseslərin avtomatlaşdırılması” ixtisası üzrə ilkin tədqiqat işlərinə başlayıb.
Məlum olur ki, o, bu il keçiriləcək Respublika Fənn Olimpiadasında kimya fənni üzrə finalçıdır. Hazırda həm olimpiadaya, həm də qarşıdakı blok imtahanlarına ciddi şəkildə hazırlaşır. Məhəmməd gələcəkdə beynəlxalq layihələrdə ölkəsini təmsil etməyi, tədqiqatlarını genişləndirərək elmi nailiyyətlərlə adını tanıtmağı qarşısına məqsəd qoyub.
Bu gün biz bu üç gənclə müxtəlif mövzularda söhbət etdik, onların arzu və məqsədlərinə şahid olduq. Hər biri qarşıdakı blok imtahanlarına daha böyük motivasiya ilə hazırlaşır. Onların əzmi və məqsədyönlülüyü bizdə də ümid və sevinc yaratdı.
Biz də bu gənclərə növbəti mərhələdə uğurlar diləyir və bir daha görüşmək arzusu ilə məktəblərdən ayrılırıq.
Bölmənin digər xəbərləri
